Këshilli i Europës lavdëron Shqipërinë për ligjin kundër diskriminimit, kritikon censusin.


Këshilli i Europës (CoE) publikoi së fundmi raportin e tij të tretë të monitorimit të Shqipërisë mbi zbatimin e Konventës së Mbrojtjes së të Drejtave të Minoriteteve, duke deklaruar se ligji kundër diskriminimit i miratuar në vitin 2010 qe një hap pozitiv ndërkohë që ndryshimet në ligjin për censusin qenë në kundërshtim me konventën.


Në deklaratën e publikuar në faqen zyrtare të Këshillit të Europës thuhet: “Shqipëria ka vijuar përpjekjet për zbatimin e Konventës Kuadër si dhe rekomandimeve të dhëna nga opinioni i dy i Komitetit Këshillues. Ligji për Mbrojtjen ndaj Diskriminimit u miratua në vitin 2010 dhe zyra e Komisionerit kundër Diskriminimit u krijua. Kodi Penal u amendua për t’i kriminalizuar diskriminimet gjinore, racore, fetare, etnike, gjuhësore apo politike duke i konsideruar ato faktorë rëndues në një krim të caktuar”.


Por raporti thotë gjithashtu që kuadri institucional për trajtimin e shqetësimeve të minoriteteve mbetet i papërshtatshëm ndërsa Komiteti Shtetëror i Minoriteteve nuk ka pavarësinë e nevojshme politike për të mbrojtur minoritetet kombëtare.


“Censusi [i popullsisë dhe banesave] u zhvillua në Shqipëri në tetor 2011. Ndryshimet e minutës së fundit në ligjin përkatës vendosën gjoba për përgjigjet e pasakta të pyetësorit dhe saktësuan se përgjigje të pasakta konsiderohen ato që nuk janë në përputhje me regjistrin civil. Vetë regjistri është një burim i pabesueshëm informacioni,” thuhet në raportin e CoE.


“Këto mendime nuk janë në përputhje me parimin e vetëidentifikimit të lirë të personave me një grup minoritar kombëtar, siç sanksionohet nga nenti 3 i Konventës Kuadër,” – thotë CoE.


Raporti u përshëndet sot edhe nga kreu i Partisë Bashkimi për të Drejtat e Njeriut Vangjel Dule, i cili i kërkoi qeverisë të reflektojë ndaj këtyre sugjerimeve.


Këshilli i Europës ka një marrëveshje kuadër për mbrojtjen e të drejtave të njeriut. Bashkimi Europian ka një kapitull të krijuar në bazë të konventës së Këshillit të Europës, kapitull që është detyrim për t’u zbatuar nga vendet si Shqipëria që aspirojnë të anëtarësohen në BE. Por dy vende sakaq anëtare, Belgjika dhe Greqia, nuk e kanë nënshkruar dhe nuk kanë ndër mend ta nënshkruajnë këtë marrëveshje.


Shqipëria përfshiu në pyetësorin për Censusin për herë të parë në shumë dekada edhe pyetjet për përkatësinë entike dhe fetare. Këto dy pyetje u debatuan ashpër në vend, ku shumë politikanë shqiptarë shprehën shqetësimin se një skemë e tillë mund të rriste artificialisht numrin e minoritetit grek, pasi shumë shqiptarë kanë patur tendencën të vetëdeklarohen grekë gjatë dy dekadave të fundit të joshur nga përfitime financiare të ofruara nga Greqia për minoritarët në Shqipëri.


Të dhënat e Censusit janë aktualisht duke u përpunuar dhe pritet të publikohen në tetor. Pyetjet për entinë dhe fenë mund të rezultojnë të pavlefshme pasi që një pyetje të konsiderohet e vlefshme duhet të marrë përgjigjen e së paku 95 për qind të popullsisë.


Gazeta-Shqip.com, 22 qershor 2012