Kryesoret LSI shpall rezultatin, Ilir Meta rikonfirmohet në krye të partisë

LSI shpall rezultatin, Ilir Meta rikonfirmohet në krye të partisë

43
SHPËRNDAJE

Ilir Meta është rikonfirmuar në postin e kreut të Lëvizjes Socialiste për Integrim. Gjatë zgjedhjeve të djeshme, Ilir Meta ka arritur të fitojë mandatin e dytë si kryetar i LSI-së duke marrë 24 439 vota (78.6%) ndaj 6653 (21.4%), që kishte marrë kandidati rival, Luan Rama. Rezultati u konfirmua nga kryetari i KQZ-së për këtë proces zgjedhor, Ylli Manjani, i cili me prezencën e dy kandidatëve në garë, të cilët uruan njëri-tjetrin sukseset.

Meta e konsideroi një fitore shumë të vlefshme, duke vlerësuar garën dhe debatin e hapur brenda partisë. Meta vlerësoi se politika ka nevojë për debat dhe alternativë dhe sipas tij LSI e sjell politikën në një stad më të lartë.

“Politika jonë ka nevojë për më shumë debat, ka nevojë për mendim alternativ, ka nevojë për bashkëjetesë të qytetëruar dhe mendoj se Lëvizja Socialiste për Integrim e sjell politikën shqiptare dhe partiake në një stad të ri edhe më të lartë, edhe më të emancipuar, edhe më europian, sepse qëllimi ynë është që edhe këto standarde që kërkojmë për të gjithë vendin t’ia aplikojmë dhe të japim shembullin tonë duke i zbatuar edhe brenda kësaj force politike. Pas përfundimit të kësaj gare ne do të vazhdojmë bashkëpunimin akoma më tej edhe me kolegun tim Luan Rama edhe me të gjithë kolegët e tjerë sepse kemi bindjen që vetëm në këtë mënyrë ne do të vazhdojmë të jemi një forcë politike shembull, jo vetëm i raporteve demokratike brenda vetvetes por edhe i mesazheve të demokracisë që përcjell në raport me të gjithë qytetarët, në raport me të gjithë votuesit”, i shpreh Meta, pas shpalljes së rezultateve të zgjedhjeve.

Në votimet e djeshme për kreun e ri të partisë, morrën pjesën 31.422 anëtarë nga 36 725 anëtarë që numëron LSI në mbarë vendin.

21 tetor 2012 (gazeta-Shqip.com)