Kryeministri Sali Berisha ka rikonfirmuar edhe njëherë që nuk do të pranojë të diskutojë çështjen e Fierit në tryezën e partive parlamentare të kërkuar nga kryesocialisti Rama. Pas qëndrimeve të shprehura në mbledhjen e grupit kuvendor demokrat, zëdhënësja e kryeministrit, Erla Mëhilli ka dal në një deklaratë për mediat ku nënvizohet fakti se Berisha në asnjë rrethanë, ai nuk do mund të pranojë diskutimin e vendimeve të gjykatave në tryeza politike.


“Në përgatitje të një takimi të mundshëm midis forcave politike, për të cilin zoti Rama, sipas një deklarate të tij të shpërndarë në media, pas ftesës së bërë nga Kryeministri, kishte rënë dakord dhe propozonte orën dhe vendin e këtij takimi për të diskutuar për problemet e integrimit dhe nuk i referohej në asnjë rresht të saj çështjes së Fierit, pati një komunikim mes dy kryetarëve të grupeve parlamentare. Kryetari i grupit parlamentar të Partisë Socialiste, zoti Gramoz Ruçi i tha mes të tjerash kryetarit të grupit parlamentar të Partisë Demokratike, zotit Astrit Patozi se në axhendën e këtij takimi nuk mund të mos përfshihej edhe diskutimi i çështjes së Fierit. Kryeministri Berisha, në këto rrethana, shpreh shpresën dhe vendosmërinë e tij për diskutime në çdo nivel me Partinë Socialiste, për tre ligjet që presin votimin në Parlament, propozimet dhe amendimet e tjera.


Këto ligje dhe votimi i tyre nuk kanë asnjë lidhje me një çështje lokale, e cila përdoret si pretekst prej tre muajsh, nga kryetari i Partisë Socialiste për bllokimin e votimit të tyre. Mesa duket me qëllimin e vetëm për të mos lejuar grupin e tij parlamentar për të votuar këto ligje, sipas kërkesës së Komisionit Europian në mënyrë që Shqipëria të marrë mbështetje për statusin e vendit kandidat në Bashkimin Europian.


Kryeministri Berisha në mënyrën më të përsëritur ka bërë të qartë qëndrimin e tij parimor se në asnjë rrethanë, ai nuk do mund të pranojë diskutimin e vendimeve të gjykatave në tryeza politike. Kryeministri ka qenë dhe mbetet i gatshëm për zbatimin e propozimit të tij të mocionit në Këshillat e Komunave e Bashkive për këshilltarët e Qarkut të Fierit, si zgjidhja e vetme politike dhe ligjore e mundshme, pa ndërhyrje në vendimet e gjykatave”, përfundon deklarata e Mëhillit.


19 nëntor 2012 (gazeta-Shqip.com)