Masakra e Belishovës
Rrëfimi në prokurori për arsyet e mënyrën e vrasjes dhe djegies së çiftit Myftaraj
Pretendimi i të pandehurit: Sherri, për ndarjen e padrejtë të parave të fituara nga skrapi e nafta e vjedhur
Me raki në një dorë dhe me armën e gjahut në dorën tjetër, ai është nisur drejt lokalit të familjes Myftaraj
Edmond Hoxhaj
Xhavit Malkaj
Zbardhet e plotë masakra e Belishovës së Mallakastrës, në fund të tetorit të vitit të kaluar, kur u vranë e u dogjën dy bashkëshortët Enver dhe Hazbije Myftaraj. Prokuroria ka përfunduar hetimet ndaj të pandehurit Xhevit Malkaj i akuzuar për vrasjen e dy bashkëfshatarëve të tij dhe disa ditë më parë ia ka përcjellë dosjen për shqyrtim Gjykatës së Fierit. Gazeta “Shqip” ka siguruar të dhëna mbi dëshminë e të pandehurit 19-vjeçar, që u ngjason skenarëve të filmave horror. Përgjatë tre muajve të kaluar, grupi hetimor i kryesuar nga prokurorja Elsa Miha ka dokumentuar autorësinë e të arrestuarit, duke kryer edhe eksperimente me qëllim zbardhjen e së vërtetës së ngjarjes që tronditi atëherë opinionin publik.
Motivi
Hazbie Myftaraj
Duket se 19-vjeçari Xhevit Malkaj ka qenë gjakftohtë në kryerjen e krimit, pasi ka treguar me detaje të gjithë masakrën, çka është përputhur plotësisht me rindërtimin e dinamikës së ngjarjes. Ai ka shprehur pendim dhe ka treguar versionin e tij për motivin që e ka çuar deri në kryerjen e këtij krimi. Sipas Malkajt, ai së bashku me viktimën Enver Myftaraj kishin rreth një vit që nxirrnin tubo hekuri në impiantet e naftës dhe i shisnin për skrap. Më tej, ai ka sqaruar se kanë vjedhur edhe solar, duke shpuar tubat e puseve të naftës. I pandehuri ka pretenduar se konfliktet mes tij dhe Enverit kishin lindur që herët. Kjo, pasi ishte viktima, ai i cili merrej me shitjen e hekurave dhe naftës dhe sipas 19-vjeçarit Malkaj, ndarja e parave nuk bëhej në mënyrë të drejtë. Për shkak të këtyre konflikteve, Enveri kishte nisur të bashkëpunonte me të tjerë për vjedhjen e skrapit dhe solarit e për këtë arsye, i pandehuri pretendon se ishte nxehur shumë. Ai ka sqaruar se mesditën e 25 tetorit 2012 është grindur me Enverin në lokalin e tij, në prani edhe të bashkëshortes Hazbije Myftaraj. Sherri ka qenë për të njëjtat motive, por në këtë kohë, ai ka marrë fyerje nga viktima. “Më quajti barbon dhe më fyeu me fjalë të tjera të rënda, ndërsa unë i thashë se do ta shikonim në të ardhmen këtë punë”, ka deklaruar i pandehuri. Më pas, 19-vjeçari është larguar për në shtëpinë e tij, ku ka qëndruar gjithë pasditen, duke u ngushëlluar me raki e duke planifikuar vrasjen.
Vrasja
Enver Myftaraj
Rreth orës 19:30 të 25 tetorit, i pandehuri është ngjitur në mënyrë të fshehtë në tavanin e shtëpisë, ku ka marrë armën e gjahut të babait, Bajram Malkajt dhe e ka fshehur në dhomën e tij. Rreth orës 20:00 ka vjedhur në shtëpi edhe katër fishekë të çiftes. Me një bidon plastik gjysmë litërsh me raki në një dorë dhe me armën e gjahut në dorën tjetër, ai është nisur drejt lokalit të Enverit, duke konsumuar pijen alkoolike. Gjatë rrugës e ka mbushur çiften me dy fishekë ndërsa të tjerët i ka futur në xhep. Kur ka shkuar tek lokali, ai ka gjetur aty vetëm bashkëshortët Myftaraj. Enveri duket se e ka parandier diçka të pazakontë, pasi e ka pyetur pse kishte marrë me vete çiften. Por, sipas të pandehurit, viktima e ka fyer sërish. Në këto kushte, ai e ka qëlluar me çifte duke e plagosur në shpatull. Më pas, 19-vjeçari është afruar dhe e ka qëlluar drejt e në fytyrë. Në këtë kohë ka ndërhyrë Hazbija, e cila është goditur një herë në kokë e një herë në shpatull me qytën e çiftes. Në këtë kohë, e plagosura është tërhequr pas banakut për t’u shpëtuar goditjeve. Autori ka shtënë një herë me çifte mbi Hazbijen, duke e plagosur rëndë në brinjë. I pandehuri ka mbyllur derën e lokalit nga brenda e ka dalë nga dhoma tjetër. Aty ka vërejtur kasafortën dhe me një fresibël, që e ka gjetur në një kasolle jashtë shtëpisë, ka nisur ta presë metalin. Pasi nuk ka mundur ta hapë kasafortën, ka shkuar sërish në kasolle, ku ka marrë një bidon me raki dhe ka spërkatur viktimat me qëllim që t’i digjte e të humbiste provat. Kur i ka spërkatur me raki, Hazbija është përmendur dhe autori e ka qëlluar me çifte në kokë. Pastaj u ka vënë flakën dy trupave dhe e ka përhapur zjarrin në të gjithë shtëpinë. Para se të largohej nga shtëpia që po digjej në flakë, ka marrë armën e gjahut të viktimës dhe ia ka lënë në dorë me qëllim që të dyshohej sikur Enveri kishte vrarë gruan e më pas veten. Më pas është kthyer në banesën e tij ku ka gjetur të atin në verandë dhe i ka treguar gjithçka kishte ndodhur.
Kërkesa
Prokuroria: Katër akuza ndaj 19-vjeçarit Malkaj
Janë katër akuza që rëndojnë mbi 19-vjeçarin Xhevit Malkaj, autorin e vrasjes dhe djegies së Enver e Hazbije Myftarajt. Ai akuzohet për “vrasje në rrethana të tjera cilësuese”, kundër dy ose më shumë personave dhe “shkatërrim të pronës me zjarr” me pasoja të rënda, “mbajtje pa leje e armëve të gjuetisë” dhe “vjedhje” e mbetur në tentativë. Prokuroria ka konkluduar se i pandehuri e ka kryer krimin i vetëm ashtu siç pretendon. Për këtë arsye u krye edhe një eksperiment hetimor për lëvizjen e kasafortës, nga ku u konkludua se i pandehuri mund ta spostonte i vetëm deri në pozicionin që u gjet. Në kasafortë u gjetën rreth 579 mijë lekë të reja, katër varëse, një unazë e florinjtë dhe dokumente të ndryshme. Rezultoi se familjarët e të pandehurit nuk kanë qenë në dijeni të planit të vrasjes, por e kanë mësuar këtë gjë nga i pandehuri pasi ndodhi.
Ekspertiza
Autori ua puthiti armën në fytyrë viktimave të tij
Nga ekspertimi mjekoligjor ka rezultuar se autori u ka dhënë nga një goditje fatale viktimave të tij. Kur ka shtënë për herë të dytë mbi Enverin, ai e ka puthitur armën mbi fytyrë dhe më pas ka tërhequr këmbëzën. Gjithashtu edhe bashkëshorten e Enverit e ka qëlluar për herë të fundit me çifte në kokë. Këto gjuajte u kanë krijuar dëmtime të shumta në kokë viktimave duke u shkaktuar vdekjen e menjëhershme. Gjithashtu, në kufomat e të ndjerëve janë konstatuar edhe gjuajtje të tjera me armë gjahu si dhe goditje me qytën e armës. Por edhe zjarri ka shkaktuar djegie të pjesshme në trupat e viktimave.