Kryesoret Pëllumbi: Përqendrimi i pushtetit, Shkaku që solli dhunën ndaj opozitës

Pëllumbi: Përqendrimi i pushtetit, Shkaku që solli dhunën ndaj opozitës

330
SHPËRNDAJE

Gjinushi – “Duket se ora e Shqipërisë ka ngelur në vend, sepse, ashtu si atëherë, edhe sot kemi të njëjtin njeri në krye të pushtetit”

Pëllumbi – “Kanë qenë momente kyçe për shtetin e ri shqiptar, që treguan më së miri tentativën për riinstalimin e një shteti autokratik”

Gonxhe – “Berisha, në vështrimin tim, nuk është një person, as një individ i thjeshtë. Pas shumë viteve tashmë ai u ka mbijetuar situatave” 

Braçe – “Kush do të prekë votën e atyre që duan të besojnë te PS-ja më 23 qershor, do të marrë një përgjigje ekzemplare, pavarësisht pushtetit” 

Gjinushi: Berisha në 8 vjet ricikloi synimet e viteve ‘92-‘97

Herion Mesi

Demostrata 1996Zgjedhjet e 26 majit të vitit 1996 u cilësuan nga ndërkombëtarët si zgjedhjet më të këqija në historinë e Shqipërisë, të cilat prodhuan gjithashtu një parlament jashtë normalitetit politik. Por, nga ana tjetër, situata politike dhe shoqërore në vend, pas këtyre zgjedhjeve, ishte e tensionuar. Më 28 maj të këtij viti, opozita e atëhershme organizoi një miting të madh në sheshin “Skënderbej”, ku Policia e Shtetit përdori forcën për shpërndarjen e mitingut, duke dhunuar protestues dhe drejtues të opozitës socialiste. Edhe pse kanë kaluar 17 vjet nga ngjarjet në fjalë, eksponentë dhe figura kryesore të politikës së asaj kohe, japin sot alarmin që opozita të jetë e kujdesshme, pasi, sipas tyre, mazhoranca qeverisëse drejtohet nga i njëjti njeri, Kryeministri Sali Berisha, i cili, sipas tyre, ishte urdhëruesi i dhunës policore që u ushtrua ndaj opozitës dhe popullit opozitar në vitet ‘96-‘97. Një nga figurat kryesore të PS-së, Servet Pëllumbi, kreu i PSD-së, Skënder Gjinushi, dhe deputeti socialist Erjon Braçe, theksuan dje për gazetën “Shqip”, rëndësinë që mbart përkujtimi i ngjarjeve të 28 majit të 17 viteve më parë, pasi “këto ngjarje janë thelbësore për të kuptuar historinë e evoluimit të demokracisë në Shqipëri gjatë këtyre viteve tranzicion”, shprehen ata.

Servet Pëllumbi

Ish-kryetari i Kuvendit të Shqipërisë, dhe një nga themeluesit e Partisë Socialiste, Servet Pëllumbi, u shpreh një ditë më parë për gazetën “Shqip”, se kujtimi i këtyre ngjarjeve i shërben më mirë historisë sonë, për ta kuptuar atë dhe për të korrigjuar gabimet e së shkuarës.

“Bëni mirë që këto ngjarje i sillni herë pas here në vëmendjen e publikut, pasi këto ngjarje janë thelbësore për të kuptuar historinë e evoluimit të demokracisë në Shqipëri gjatë këtyre viteve tranzicion. Këto ngjarje nuk duhen harruar asnjëherë, pasi kanë qenë momente kyçe për shtetin e ri shqiptar, që treguan më së miri tentativën për riinstalimin e një shteti autokratik, pushteti i të cilit po përqendrohej në duart e një njeriu të vetëm, që ishte Presidenti i asaj kohe, Sali Berisha. Dhe pikërisht kjo tentativë për grumbullimin e pushteteve, shkaktoi atë që shteti i asaj kohe të dhunonte në mënyrë demonstrative opozitën, e pikërisht në ditën e votimit. Ndaj është tejet e domosdoshme që kjo ngjarje të mos harrohet, pasi, edhe pse kanë kaluar 17 vjet nga ajo ditë, sërish kemi në pushtet të njëjtin njeri, që atëherë dhunonte opozitën, dhe që si në atë kohë, edhe sot po tenton të mbledhë në duart e tij të gjitha pushtetet”, theksoi Pëllumbi.

Skënder Gjinushi

Kryetari i PSD-së, Skënder Gjinushi, shprehet se asgjë nuk ka ndryshuar në këtë vend, kjo sepse këto vite qeverisjeje i kanë shërbyer atij për të ricikluar pikëpamjet që ai kishte edhe në vitet 1992-1997. “Çfarë mund të ketë ndryshuar që nga ‘96 kur u dhunua opozita dhe populli opozitar i asaj kohe?! Asgjë. Pasi duket se ora e Shqipërisë ka ngelur në vend, sepse, ashtu si atëherë, edhe sot kemi të njëjtin njeri në krye të pushtetit, i cili përpiqet me të gjitha mënyrat për të uzurpuar institucionet, duke tentuar t’i përqendrojë të gjitha pushtetet në duart e tij. Këto vite në qeveri e ricikluan Saliun në pikëpamjet që kishte edhe në vitet ‘92 deri në ‘97-n. Atëherë u vodhi vetëm paratë shqiptarëve, ndërsa tani u mbledh pronat. Ndërkohë që po e shpalos gjithnjë e më shumë tiparin e tij antishqiptar. Përveç ndarjes që kërkon të bëjë të ditës së Çlirimit me të Pavarësisë, ku çuditërisht u shfaq në përpjekjet e tij për të ringjallur Zogun, pra një dashuri e paparë e Berishës, i cili deri në ’94-n ka thënë të gjitha të zezat për Ahmet Zogun, tani e ngre në piedestal. Dhe kjo, sepse e shikon se është një identikit i tij. Kanë të dy të njëjtat cilësi: kanë vrarë kundërshtarët e tyre politikë dhe ka frenuar demokratizimin e vendit gjatë këtyre viteve. Pra, në thelb asgjë nuk ka ndryshuar nga vija politike e Berishës”, u shpreh dje Skënder Gjinushi.