Kulturë Dritëro Agolli dhe miqtë nga Devolli

Dritëro Agolli dhe miqtë nga Devolli

504
0
SHPËRNDAJE

E bija e Dritëro Agolli sjell kujtimet  e tre viteve më parë

Duke shfletuar ditarin tim , ngeca në një kujtim të para tre viteve

12 prill 2014 . Do të vinin disa miq nga Mokra , Gora e Devolli . Kishin përgatitur edhe një surprizë për babin. I kishin bërë një këngë e do ja këndonin . Dritëroi kishte 3 ditë që përgatitej për këtë takim , i ndryshëm nga të tjerët. Ja kishte ënda të këndonte e t’ja merrte me iso . Kruante zërin e ja merrte këngës çdo pasdite. Pinin nga një gotë të dy me Sadijen e ja merrnin këngës së manushaqes . E siç thotë fjalëbukuri im atë, edhe bretkoca në të thatë nuk këndon .

Në orën 11 mbërritën mysafirët këngëtarë e pasi u rehatuan ja morën këngës së Dritëroit. Njëri që ja kthente , e kishte zërin shumë të bukur e babi shpesh përsëriste: ky kënduaka si Ali Kondi .
E ku i durohej babit . Nisi të këndonte vetë manushaqen, “që të mora jo për punë, po për muhabet” etj-Po do marrim dhe ndonjë këngë patriotike -tha .

E ja nisi këngës për Gani Butkën . Njëri që i qëndronte afër , i përplaste duart nga qejfi ; fishkëllente , bërtiste “jepini djema” e “ju lumtë goja”; puthte kokën e babit dhe e përgëzonte me gjithë zemër. Kënduan tërë ato këngë e Dritëroi nuk po i linte të iknin.
Jo- thoshte – i zoti i shtëpisë urdhëron . E pastaj , ai duhet të këndojë këngën e mbylljes.
Pinte cigare e këndonte. Ndonjëherë mes tymit ngrinte sytë e menduar e pak të lagësht . Duke e vëzhguar mendoja : si im atë nuk ka të dytë, i adhurueshëm , patriot , modest e i mënçur . Ata që ishin më të rinj se ai nuk mbanin mend fjalët e këngëve siç i mbante mend Dritëroi .

E shihja që këndonte duke ngritur pak kokën , sikur donte të mbushej me firomë; sytë mu mbushën me lot , duke menduar sa keq që kaluan vitet e ai tashmë është 82 vjeç, e çdo ditë për të duhet të falenderoj e t’i falem
Zotit .

Mysafirët ikën e kur mbetëm vetëm pyeste Anën: Hë moj pëllumbesha e gjyshit , si këndova ?

– Shumë mirë o gjysh , më mirë se ata,pasi nuk ishe monoton, e kishe zërin melodioz, me variacion ,me ulje , ngritje , melodi . Shumë mirë o gjysh .

– Po ja , dale ta dëgjoj , ma trego atë që filmove – insistonte babushi .

E kēnaqej duke e parë e dëgjuar veten.

16 shkurt 2017 (gazeta-Shqip.com)