Politikë Basha: Zgjedhje pa opozitën nuk ka

Basha: Zgjedhje pa opozitën nuk ka

304
SHPËRNDAJE

Në një deklaratë për shtyp, kreu demokrat Lulzim Basha deklaroi se shërbëtorët e krimit duhet të kuptojnë se zgjedhje pa opozitën nuk mund të ketë.

Sipas Bashës, Rama së bashku me udhëheqësit e lartë të Partisë Socialistë janë të gjithë funksionarë ose pinjollë të ish-elitës komuniste.

“Edi Rama dhe udhëheqësit e lartë të PS-së, pothuajse të gjithë funksionarë ose pinjollë të ish-elitës komuniste, ngatërrojnë dëshirat e tyre me vullnetin e popullit dhe identifikojnë karrigen e tyre me demokracinë.

Ata e kanë të vështirë të kuptojnë pluralizmin, të kuptojnë sovranitetin e qytetarëve mbi pushtetin e tyre.

Trimat dhe trimëreshat socialiste, shërbëtorë të krimit por që ndihen padronë të popullit, duhet të kuptojnë se zgjedhje pa opozitën nuk mund të ketë, se qeverisje të dalë nga zgjedhje pa opozitën nuk mund të ketë.

Ne nuk kemi asnjë ngut dhe nuk kemi asnjë mëdyshje. Ne jemi të qetë, por të palëkundur në qëndresën tonë. Zgjedhje të ndikuara apo kontrolluara nga krimi nuk do të ketë. Zgjedhje me shërbëtorë të krimit në qeverisje nuk do të ketë.

Zgjedhje me Edi Ramën kryeministër nuk do të ketë. Situata është e qartë dhe e thjeshtë: ne jemi me popullin, ata janë me krimin. Vetëm njerëzit me gjendje jo të kthjellët psiqike nuk e kuptojnë dot se cili do të jetë rezultati i kësaj përballjeje”, deklaroi Basha.

20 mars 2017 (gazeta-Shqip.com)