Kryesoret De Biazi publikon listën për Italinë, 4 lojtarë nga Superiorja

De Biazi publikon listën për Italinë, 4 lojtarë nga Superiorja

616
0
SHPËRNDAJE

Trajneri Xhani De Biazi ka publikuar listën e lojtarëve, që do të ketë në dispozicion për ndeshjen kualifikuese të 24 marsit me Italinë dhe miqësoren e 28 marsit me Bosnjë Hercegovinën.

Sfida e parë me axurrët do të luhet të “Renzo Barbera” të Palermos, në orën 20:45, në kuadrin e fushatës eliminatore për “Botërorin 2018”, ndërsa e dyta në “Elbasan Arena”, në orën 18:00 dhe ka karakter testues e kolaudues për grupin.

Janë 23 emra në listën e publikuar, mes të cilëve edhe katër lojtarë të Superligës, si Orges Shehi, Alban Hoxha, Albi Alla dhe Liridon Latifi.

Mbetet përfundimisht jashtë Shkëlzen Gashi, edhe Ergys Kaçe, që sipas gjasave e kanë mbyllur aventurën me kombëtaren, sa të jetë trajner De Biazi.

Mungesat në radhët e kuqezinjve për përballjen me fqinjët e përtej Adriatikut janë me peshë.

Portieri Etrit Berisha dhe qendërmbrojtësi Berat Gjimshiti nuk mund të luajnë ndaj Italisë, sepse janë të pezulluar. Kartonët e kuq që morën të dy në kualifikuesen e fundit në radhë, ndaj Izraelit, i lë ata jashtë përplasjes me të besuarit e Venturës.

Po kështu, mungesë e madhe do të jetë edhe ajo e Mërgim Mavrajt, që është lënduar dhe nuk riaftësohet dot për më 24 mars. De Biazit i duhet të riformatojë prapavijën, ndërkohë që edhe në reparte të tjera nuk ka ndonjë garanci të madhe, për shkak se lojtarët kuqezinj nuk po aktivizohen sa duhet me klubet respektive.

20 mars 2017 (gazeta-Shqip.com)