Aktualitet Lirimi i të ndaluarit për 5 tonë drogë, KLD heton vendimin e...

Lirimi i të ndaluarit për 5 tonë drogë, KLD heton vendimin e gjykatës së Vlorës

192
0
SHPËRNDAJE

Këshilli i Lartë i Drejtësisë thotë se ka ndjekur me vëmendje informacionet e transmetuara në median e shkruar dhe vizive mbi lirimin nga paraburgimi të Rakip Arapaj, i hetuar në masë sigurie arrest me burg, për mbi 5 tonë lëndë narkotike në fshatin Llakatund, Vlorë.

KLD konstaton se vendimi gjyqësor për lirimin e tij, dhënë nga gjyqtari A.B., i Gjykatës së Rrethit Gjyqësor Vlorë, ka probleme serioze me ligjin. Ne këto kushte, pasi u shqyrtuan paraprakisht të dhënat e transmetuara në media, si dhe kuadri ligjor në fuqi, konkretisht dispozitat e Ligjit nr. 96/2016 “Për statusin e gjyqtarëve dhe të prokurorëve në RSH”, është çmuar se ka vend për verifikimin e rastit në fjalë.

Inspektorati i KLD-së, ka filluar verifikimit për mbledhjen e të gjitha provave të nevojshme që hedhin dritë mbi faktet e ekspozuara në ankesën publike, duke i kërkuar Gjykatës së Rrethit Gjyqësor Vlorë paraqitjen e të gjitha vendimeve dhe procesverbaleve mbi procesin gjyqësor të zhvilluar ndaj të pandehurit R.A., lidhur me caktimin e masës së sigurimit “arrest në burg” dhe lidhur me lirimin e tij nga paraburgimi. Në vijimësi KLD, nisur edhe nga ndjeshmëria e madhe që ka çështja, do të bëjë publike rezultatet e dala nga monitorimi.

12 tetor 2017 (gazeta-Shqip.com)