Aktualitet Në burg edhe sekserët, ndalohet kushëriri gjyqtarit Shkëlqim Miri

Në burg edhe sekserët, ndalohet kushëriri gjyqtarit Shkëlqim Miri

298
SHPËRNDAJE

Shkëlqim Miri do të dalë të dielën para kolegëve të Krimeve të Rënda për t’iu caktuar masa e sigurisë.

Prokuroria e Krimeve të Rënda ka depozituar kërkesën për masën e arrestit me burg për gjyqtarin e Apelit Tiranë, në shtëpinë e të cilit u sekuestruan 174 mijë euro, 10 mln lekë dhe 1 mijë dollarë.

Por krahas gjyqtarit, Prokuroria ka urdhëruar ndalimin e 2 personave të tjerë të cilët dyshohet të kenë patur rolin e ‘sekserit’ dhe ndërmjetësit në skemën e klasifikimit të veprës penale nga “Vrasje me dashje” në “Plagosje e rëndë ” për Gentian Dodën i liruar pak kohë më parë pas ekstradimit në Amerika.

“Sekserët ” e ndaluar të cilët dyshohet të kenë realizuar edhe ” pazarin ” prej 20 mijë eurosh, janë Kujtim Miri i afërm i gjyqtarit dhe Alban Buci. Ata kanë qenë pjesë e hetimit të nisur që në janar të 2017-ës. Gjyqtari Miri akuzohet për veprat penale të ” korrupsionit aktiv dhe pasiv të gjyqtarit, prokurorit dhe funksionarëve të tjerë të drejtësisë “.

Ai u ndalua në kuadër të operacionit të koduar ” një vrasje e dytë “. Gjyqtari me një karrierë 25 vjeçare në sistemin e drejtësisë, rrezikon një dënim nga 5 deri në 12 vite burgim nëse shpallet fajtor mbi akuzat e ngritura nga prokuroria ndërkohë që pritet edhe mbledhja e këshillit të lartë të drejtësisë për pezullimin e tij nga detyra.

11 nëntor 2017 (gazeta-Shqip.com)