Rajon Bllokohet aeroporti i Beogradit, devijohet fluturimi nga Tirana

Bllokohet aeroporti i Beogradit, devijohet fluturimi nga Tirana

1305
SHPËRNDAJE

Një avion i linjës ajrore “Air Serbia”, me itinerar nga Tirana drejt Beogradit që është nisur mëngjesin e kësaj të mërkure në orën 4:35, nuk ka mundur të mbërrijë në kryeqytetin serb, por ka devijuar fluturimin përkohësisht në Rumani.

Shkak është bërë mbyllja e përkohshme e Aeroportit “Nikola Tesla” në Beograd, si pasojë e disa problemeve teknike të një avioni të kompanisë “Egypt Air”.

Lajmi konfirmohet nga autoriteti aeroportual serb, që sqaroi se avioni “Boeing 737-800” zbriti pa pasagjerë në orën 4:11 në aeroportin e kryeqytetit serb. Avioni mbeti i ndalur në pistë për shkak të problemeve teknike.

Disa ekspertë teknikë kanë ndërhyrë sipas procedurave të parashikuara në të tilla raste. Të gjithë avionët e linjës serbe “Air Serbia” janë devijuar nëpër aeroporte të ndryshme të rajonit.

Ndërkohë, të gjithë ata që kishin planifikuar nisjen nga Beogradi për në destinacione të tjera do të informohen nga autoriteti aeroportual në vend.

12 shtator 2018 (gazeta-Shqip.com)