Top News mëson detaje nga grupi hetimor në lidhje me zhdukjen e Mateo Likës, i riu nga Fieri që ka humbur kontaktet me familjen që prej datës 15 janar.
Pista kryesore e hetimit është rënia në Lumin e Semanit, pas një aksidenti me automjetin e tij të marrë me qira. Për këtë arsye për të 3-tën ditë me radhë, polumbarët janë zhytyr në lumë, por ende nuk është gjetur as makina dhe as ndonjë shenjë e 26-vjeçarit.
Pikërisht për shkak se kërkimet nuk po japin rezultat, Policia po shqyrton dhe një pistë të dytë, atë të largimit nga vendi i aksidentit që mund të ketë bërë i riu.
Mateo Lika ka përplasur bordurën anësore të urës, copëza të së cilës janë gjetur në Lumë, ndërkohë që një targë e dyshuar e automjetit me të cilin lëvizte ai është gjetur në rrugë. Prandaj grupi hetimor nuk përjashton mundësinë që ai të ketë ikur nga frika e aksidentit dhe të jetë fshehur.
Lika kishte disa ditë që ishte kthyer nga jashtë shtetit për të qëndruar te familja e tij në Fier, ndërkohë që po lëvizte me një automjet të marrë me qira, i cili nuk kishte GPS. Deri në këto momente, i riu nuk është larguar jashtë vendit, të paktën në rrugë ligjore, referuar kontrolleve në Sistemin TIMS, prandaj kontrollet janë përqëndruar jo vetëm në nga polumbarët në lumin Seman, por edhe në vende ku aia mund të jetë fshehur.