SPAK ka bërë një goditje të fortë ditën e sotme në Gjykatën e Krujës, pasi ka urdhëruar arrestimin gjyqtares Enkelejda Hoxhën.

Emri i gjyqtares së Krujës Enkeleida Hoxha tashmë lidhet me lirimin nga burgu të disa të dënuarve, përmes vendimeve të dyshimta, para se ajo të përballej me Vetingun. Enkeleida Hoxha u ka hapur dyert e burgut ish-numrit dy të bandës së Durrësit Endrit Dokle, duke i shuar dënimin përjetë, Genc Tafilit, i dënuar për vrasjen e komisarit të Policisë Arben Zylyftari si dhe Ilir Pajës, të cilit i kishte mbetur mbi një vit dënim.

Sipas raportit hetimor të ILD, gjyqtarja e Krujës ka dhënë 6 vendime në harkun kohor të maj 2017- nëntor 2019 që përbëjnë akte që diskreditojnë figurën e gjyqtarit.

ILD konstaton se gjyqtarja Hoxha ka kryer procese tërësisht të njëanshme teksa kujton se ajo ka gisht edhe në një vrasje të këtij viti, Hekuran Billës të cilin e liroi edhe këtë para kohe me kusht dhe në fund u ekzekutua.

Inspektori i Lartë i Drejtësisë Artur Metani ka paralajmëruar se vendimet e gjyqtares Hoxha do të jenë objekt verifikimi. Por, ndërsa e Enkelejda Hoxha vijon të marrë vendime, dyshime të forta shfaqen rreth pasurisë së saj. 

Formularët vjetorë të pasurisë së gjyqtares së shumëdebatuar pothuajse janë bosh. Nga viti 2003, kur ka deklaruar pasurinë për herë të parë deri në vitin 2018, kur ka dorëzuar deklaratën e fundit, gjyqtarja Enkelejda Hoxha deklaron vetëm pagën. Deklarata e parë e pasurisë e vitit 2003 përmban vetëm një shënim, të ardhura nga paga. Gjyqtarja nuk deklaron asnjë banesë ku mund të jetonte në atë kohë, qoftë në emër të prindërve apo që mund ta kishte marrë me qira. Sipas kësaj deklarate, gjyqtarja nuk dihet se ku ka jetuar dhe as ku jeton sot. Në vitin 2004, gjyqtarja Hoxha deklaron 784 392 lekë nga paga, 1 000 000 lekë qira të dyqanit të mamasë dhe 165 000 lekë pension të paspecifikuar. Në 2005 deklaron 500 000 lekë kursime dhe pagën. Në 2006 deklaron 5 mijë euro cash, pagën si gjyqtare dhe detyrim ushqimor për fëmijën e saj, në vlerën 120 000 lekë. 

Në vitet 2007, 2008, 2009 dhe 2010 deklaratat janë të njëjta si në vitin 2006. Në vitin 2011, deklaron pagën dhe pagesë për fëmijën, por tashmë të specifikuar nga babai i fëmijës, Rasim Doda, në shumën 120 000 lekë për një vit. Në vitet 2012 dhe 2013 deklaron vetëm pagën, as kursime dhe asgjë tjetër. Në 2014, deklaron sërish kontribut për fëmijën nga z. Doda si dhe 216 000 lekë të ardhura invaliditeti për fëmijën. Në 2015 deklaron vetëm pagën dhe të ardhura invaliditeti për fëmijën. Në 2016, deklarata është si e vitit 2015, por vetëm shtohet kontributi i z. Doda për fëmijën. Në vitit 2017 dhe 2018 nuk ndryshon asgjë. Mbetet mister se në çfarë banese jeton gjyqtarja Hoxha, kur në të gjitha deklaratat e pasurisë nuk ka deklaruar asgjë, përveç pagës.