Pas denoncimit të ditës së djeshme në media për një mësues që akuzohej nga nxënësja e tij se e kishte ngacmuar seksualisht, policia e Beratit është vënë në lëvizje dhe e ka arrestuar ditën e sotme.
Mësuesi nga fshati Barç i Skraparit, Servet Bejo, 62 vjeç, është ndaluar nga efektivët e policisë dhe prej disa orësh ndodhet në komisariat, ku po merret në pyetje në lidhje me ngjarjen.
Në ambientet e policisë është shoqëruar edhe e mitura 14-vjeçe së bashku me prindërit e saj.
Reagim i Drejtorisë Vendore të Policisë Berat:
Mbi rastin e transmetuar në emisionin investigativ ”Fiks Fare”, për një nxënëse 14 vjeçe që ka pohuar se është ngacmuar seksualisht nga mësuesi i saj, në shkollën e fshatit Barç, Skrapar, sqarojmë opinionin publik se:
Shërbimet e Komisariatit të Policisë Skrapar e kanë shoqëruar menjëherë shtetasin S. B.(mësues), në ambientet e Komisariatit.
Gjithashtu, në ambientet e DVP Berat, i është marrë deklarata nxënëses 14 vjeçe, në prani të prindit të saj, psikologut dhe avokates.
Në përfundim të veprimeve, shërbimet e Policisë kanë referuar materialet në prokurori dhe ka nisur procedimi penal për shtetasin S. B., 62 vjeç, banues në fshatin Barç, Skrapar, për veprën penale “Ngacmimi seksual”.
Drejtoria Vendore e Policisë Berat është e angazhuar maksimalisht për të parandaluar, evidentuar dhe goditur paligjshmëritë, në çdo fushë, dhe në këtë kuadër inkurajon qytetarët që për çdo rast paligjshmërie, të denoncojnë në numrin 112 ose në Komisariatin Dixhital, duke iu garantuar reagim të shpejtë dhe ligjor.