113-vjetori i Pavarësisë bëri bashkë politikanë të Shqipërisë e Kosovës, përfaqësues të trupit diplomatik të akredituar në Tiranë, njerëz të medias e kulturës, në pritjen zyrtare të organizuar në Pallatin e Brigadave, organizuar nga Kreu i Shtetit, Bajram Begaj.
Krah kryeministrit Edi Rama dhe bashkëshortes së tij, Linda, atmosferës kuqezi ju bashkuan në mbrëmje edhe Presidentja e Kosovës, Vjosa Osmani, si dhe ambasadori i Bashkimit Evropian në Tiranë, Silvio Gonzato. Para të ftuarve, Presidenti Begaj e nisi me mesazhin për bashkim dhe forcimit të faktorit shqiptar në Ballkan.
Në fjalën e tij, Kreu i Shtetit tha se në 113 vite e pavarur, Shqipëria ka krijuar një imazh serioz në arenën ndërkombëtare, ndërsa theksoi rëndësinë e integrimit në Bashkimin Evropian.
Në mesazhin e tij, Presidenti Begaj nuk la pa përmendur edhe të gjithë shqiptarët, që Pavarësinë e festojnë jashtë territorit shqiptar, anembanë botës.
Në fund, kreu i Shtetit Shqiptar kujtoi luftërat që po zhvillohen në botë, duke vlerësuar kontributin e Shqipërisë në paqe, siguri dhe dialog, si aleate e NATO-s, ndërsa theksoi se vendi ynë mbetet aleat i fortë i Bashkimit Evropian dhe Shteteve të Bashkuara.
Nga ana tjetër Ram ka bërë një postim në rrjete sociale ku e konsideron pjesëmarrjen e presidentes Vjosa Osmanit, kuptimplotë.
“Mbrëmja Tradicionale Kuqezi e Ditës së Pavarësisë, organizuar sonte bukur si asnjëherë nën kujdesin e Presidentit të Republikës, me praninë kuptimplotë të Presidentes së Kosovës”, shkruan Rama.
