Në Sheshin e Flamurit në Vlorë, po bëhen përgatitjet e fundit për ceremoninë e ngritjes së flamurit, e cila do të shënojë 113-vjetorin e Shpalljes së Pavarësisë së Shqipërisë. Qytetarë të Vlorës, por edhe shumë shqiptarë nga Kosova, kanë mbërritur për të festuar këtë ditë historike.
Në ceremoninë zyrtare, që do të zhvillohet më 28 Nëntor, do të marrin pjesë Presidenti i Shqipërisë, Bajram Begaj, Kryetari i Parlamentit Niko Peleshi, Kryeministri Edi Rama, dhe Presidentja e Kosovës, Vjosa Osmani. Të pranishmit në ngjarjen e shënuar kanë përcjellë urime të ngrohta për festën, duke i uruar gëzuar të gjithë shqiptarëve, kudo që ndodhen.
Një qytetar nga Kosova, që ka ardhur për të festuar në Vlorë, shprehu emocionet e tij: “Sot, më 28 Nëntor, kemi ardhur nga Kosova. Jam shumë i kënaqur që po shkel tokën e Vlorës dhe po i shoh dhe përqafoj vëllezërit e mi. Të gjithë shqiptarët, kudo që janë, duhet të bashkohen.”