Detaje të reja janë zbardhur në lidhje me vrasjen e Alfred Dedjas i cili u ekzekutua pasditen e djeshme në një lokal në Ndroq nga Julian Gjoshi. Mësohet se ditën e sotme policia ka zhvilluar kontrolle në Tiranë, Durrës e Shijak për arrestimin e 27-vjeçarit.
Ndërkohë bëhet me dije se janë marrë në pyetje më shumë se 20 dëshmitarë mes të cilëve edhe personi që ishte në tavolinë me autorin. Pas ngjarjes së rëndë u raportua se shkak i vrasjes dyshohet të jetë prishja e pazareve të drogës.
Ngjarja e rëndë është regjistruar pasditen e djeshme, më 1 dhjetor rreth orës 15;30 në një lokal në Ndroq. Në fillim u raportua për të shtëna ndërsa pak minuta më pas u raportua për një viktimë. Nga të shtënat mbeti viktimë Alfred Dedja ndërsa në lidhje me vrasjen është identifikuar autori 27-vjeçar Julian Gjoshi.
Pas ngjarjes ai është arratisur me një “Benz” të zi. Sipas raportimeve ngjarja ka ndodhur pas një sherri në lokal. Autori është futur në lokal dhe është ulur përballë tavolinës së viktimës. Më pas 50-vjeçari ka shkuar të flasë me të riun por situata ka agravuar dhe ata kanë debatuar. Gjatë debatit i riu ka nxjerrë armën dhe e ka qëlluar për vdekje. Gjoshi mësohet se është kunati i Altin Hajrit ndërsa në vitin 2021 ishte arrestuar për armëmbajtje pa leje. 50-vjeçari më parë merrej me aktivitetin e lojërave të fatit dhe vite më parë ka punuar edhe te kompleksi i Altin Hajrit në Shijak. Gjithashtu bëhet me dije se viktima ishte me precedentë penalë për vjedhje dhe trafikim i lëndëve narkotike.