Arratisja e Hasan Ferracakut të masakrës së Velipojës, AMP vë në pranga katër efektivët që e ruanin

Katër punonjës të Agjencisë së Mbikëqyrjes Policore (AMP) në Shkodër janë arrestuar në flagrancë, të dyshuar për veprën penale “Shpërdorim detyre”.

Sipas njoftimit zyrtar, arrestimi është kryer pas informacioneve se shtetasi Hasan Ferracaku, i cili ndodhej nën masën e sigurisë “arrest në shtëpi” në kuadër të hetimeve për ngjarjen e njohur si “Masakra e Velipojës”, nuk është konstatuar në banesën ku duhej të mbahej nën mbikëqyrje.

Pas verifikimeve dhe veprimeve hetimore, AMP ka arrestuar inspektorët Dorjan Hasandoçaj, Gentian Xhanari, Dioniz Hotaj dhe punonjësin Ridvan Zefi, të gjithë me detyrë në Trupën Operacionale të Njësisë së Sigurisë Kombëtare Shkodër.

Në të njëjtën kohë, ndaj Hasan Ferracakut rëndon edhe akuza për “Largim të të burgosurit nga vendi i qëndrimit”, pasi dyshohet se ka thyer kushtet e masës së sigurisë të vendosur nga gjykata.

Materialet procedurale janë referuar pranë Prokuroria e Shkodrës, ndërsa hetimet vijojnë për zbardhjen e plotë të rrethanave dhe përgjegjësive të rastit.