Policia e Shtetit ka finalizuar operacionin “Flagranca”, duke arrestuar dy persona të dyshuar për trafik lëndësh narkotike në fshatin Grabian.
Bëhet fjalë për T. F., 26 vjeç, dhe A. H., 29 vjeç, të cilët dyshohet se siguruan sasi të konsiderueshme droge, e ndanin në doza dhe e shpërndanin në zona të ndryshme.
Të rinjtë u kapën gjatë lëvizjes me automjet, ndërsa policia sekuestronte doza kanabisi dhe kokaine gati për shitje. Kontrolli i mëtejshëm në banesa nxori në pah dhjetëra doza të tjera, një automjet, një peshore elektronike, pajisje për përpunim droge dhe tre celularë.
Materialet janë referuar Prokurorisë pranë Gjykatës së Juridiksionit të Përgjithshëm Fier për veprime të mëtejshme.