Atentati ndaj 45-vjeçarit Julian Sula nga Karbunara e Lushnjës, i cili u krye disa ditë më parë, ka mbetur i paçartë, pasi autorët ende nuk janë identifikuar dhe janë në kërkim nga policia.
Sipas informacionit të siguruar, atentatorët kanë vepruar në mënyrë shumë të organizuar dhe të shpejtë. Ata kanë dalë nga një automjet që ishte parkuar në kthesën e rrugës “Misto Mame” dhe kanë goditur makinën BMW të Sulës me plumba, duke përdorur një kallashnikov dhe një pistoletë.
Sula ka pasur një reagim të shpejtë, pasi ka vënë re dy personat e maskuar që i kishin tendencën për ta sulmuar dhe ka shtuar shpejtësinë e makinës, duke shpëtuar për mrekulli nga plumbat. Atentati ka zgjatur vetëm 10 sekonda, por megjithatë, plumbat kanë goditur makinën e Sulës, ndërsa një plumb e ka prekur atë në këmbë. Pas ngjarjes, autorët janë larguar dhe kanë djegur makinën së bashku me armët në fshatin Lifaj, duke tentuar të fshihnin çdo gjurmë të krimit.
Julian Sula, pas atentatit, ka shkuar në lokalin e tij në Karbunare dhe më pas në shtëpi, ku ka qëndruar për disa minuta para se të kërkonte ndihmën e mjekëve për lëndimin në këmbë. Policia ka nisur hetimet për të zbuluar autorët e sulmit dhe ka marrë në pyetje 18 persona lidhur me ngjarjen, përfshirë të afërm të Sulës.
Pistat kryesore të hetimit përfshijnë disa aspekte të jetës dhe aktivitetit të Sulës, që mund të kenë lidhje me ngjarjen. Ndër to, janë dyshimet për lidhjet e tij me trafikun e narkotikëve, lidhjet e mundshme me grupe të caktuara kriminale dhe përfshirja e tij në biznes dhe politikë. Sula është një person i njohur për policinë, pasi është arrestuar më herët për armëmbajtje pa leje dhe është ndaluar disa herë për çështje të tjera.