Mustafa Sheqeri, i njohur gjithashtu me emrin Muçi Shaljani, është në gjendje të rëndë shëndetësore pasi mori 10 plumba, dy prej të cilëve në kokë, gjatë një atentati të ndodhur në zonën e Rinasit. 40-vjeçari, i cili aktualisht është i intubuar dhe nën kujdesin intensiv të mjekëve, mbeti i plagosur rëndë, ndërkohë që bashkëudhëtari i tij, 47-vjeçari Gilmando Dani, humbi jetën në vend.
Ngjarja e rëndë ndodhi ditën e djeshme, kur automjeti që udhëtonin të dy ata u qëllua me breshëri plumbash nga persona ende të paidentifikuar. Sheqeri është plagosur rëndë, me plumba në disa pjesë të trupit, ndërsa dy nga plagët më të rënda janë ato në kokë. Mjekët janë angazhuar maksimalisht për të shpëtuar jetën e tij, por gjendja e tij mbetet kritike dhe e paqëndrueshme.
Sipas burimeve nga spitali, Sheqeri vazhdon të jetë i intubuar në repartin e reanimacionit, ndërsa ekipi mjekësor po monitoron me kujdes çdo zhvillim. Të dy të lënduarit sapo ishin kthyer nga Barcelona, kur ndodhi atentati.
Përveç hetimeve që po kryhen nga autoritetet për të zbuluar autorët e sulmit, ngjarja ka tronditur opinionin publik dhe ka ngritur pyetje mbi rrethanat e krimit.