Avokatët ndërkombëtarë që përfaqësojnë kryebashkiakun e Tiranës, Erion Veliaj, kanë kërkuar nga Prokuroria e Posaçme autorizimin për ta takuar atë në ambientet e paraburgimit.

Sipas informacioneve të bëra publike, kërkesa e depozituar në SPAK lidhet me përgatitjen e hapave të mëtejshëm ligjorë të Veliajt. Konkretisht, mbrojtësit e tij po punojnë për finalizimin e aplikimit që pritet t’i drejtohet Gjykatës Evropiane për të Drejtat e Njeriut (GJEDNJ).

Ndërkohë, procedimi penal ndaj kryebashkiakut ka kaluar tashmë në një tjetër fazë, pasi SPAK ka mbyllur hetimet dhe ka dërguar çështjen për gjykim në Gjykatën e Posaçme të Shkallës së Parë.

Sipas konkluzioneve të organit të akuzës, ndaj Veliajt janë ngritur 13 akuza, ndërsa bashkëshortja e tij, Ajola Xoxa, përballet me 12 akuza.

Nga hetimet paraprake, SPAK pretendon se Veliaj dhe Xoxa kanë vepruar në bashkëpunim në nëntë episode të ndryshme, duke siguruar përfitime të parregullta në formën e parave dhe pasurive të paluajtshme. Sipas akuzës, këto përfitime dyshohet se janë dhënë nga kompani private dhe organizata jofitimprurëse që, nga ana tjetër, kanë marrë leje ndërtimi apo fonde publike të lidhura me Bashkinë e Tiranës.

Prokuroria pretendon se gjatë hetimit janë administruar prova dhe të dhëna që lidhen me mënyrën e miratimit dhe shpërndarjes së fondeve. Sipas SPAK, në cilësinë e kryetarit të Bashkisë së Tiranës, Veliaj ka firmosur miratimin e fondeve që më pas dyshohet se kanë përfunduar te organizata jofitimprurëse të kontrolluara nga bashkëshortja e tij ose nga persona të afërt me të.

Një tjetër pjesë e dosjes lidhet me pasuri të paluajtshme me vlerë të konsiderueshme. Organi i akuzës pretendon se Veliaj dhe Xoxa kanë përfituar në mënyrë të parregullt pasuri nga subjekte private që kishin marrë fonde publike ose leje ndërtimi nga Bashkia e Tiranës.

Për episodet e hetuara, SPAK pretendon se veprimet e të pandehurve plotësojnë elementët e veprës penale të parashikuar nga neni 260 i Kodit Penal. Ndërsa për shoqëritë tregtare dhe organizatat jofitimprurëse që dyshohet se kanë dhënë përfitimet e parregullta, organi i akuzës i referohet veprës penale të parashikuar nga neni 245.

Pretendimet e SPAK mbeten akuza të organit të prokurorisë dhe do t’i nënshtrohen shqyrtimit gjyqësor.