Në protestën e mbrëmshme të opozitës të shoqëruar me tensione, 4 protestues janë dëmtuar si pasojë e përplasjes me policinë, ndërsa nga radhët e policisë janë lënduar 5 efektivë. Të lënduarit ndodhen të shtruar në QSUT prej mbrëmjes së djeshme, me lëndime në pjesë të trupit.
Një prej të plagosurve është dhe aktivisti i PD, Aulon Kalaja, i cili u vizitua mbrëmjen e djeshme nga kryetari i PD, Sali Berisha. Ndërsa ministri i Brendshëm Besfort Lamallari së bashku me drejtuesin e policisë së Shtetit, Skënder Hita, vizituan nga afër 5 efektivët e plagosur në protestë.
Tensionet mes policisë dhe protestuesve, nisën menjëherë pas mbylljes së fjalimeve në podium, protestuesit hodhën fishekzjarrë e molotovë në drejtim të Kryeministrisë, gjë që u shoqërua me ndërhyrjen e menjëhershme të policisë. Deputetë demokratë Luçiano Boçi dhe Klevis Balliu u lënduan nga spraji lotsjellës dhe u transportuan në spital si edhe disa protestues të dëmtuar nga gazi lotsjellës. Një efektiv policie u lëndua gjithashtu për shkak të një kapsolle që i shpërtheu në trup. Policia shoqëroi 22 persona ndërsa u sekuestruan 4 çanta me molotovë.