Dy persona me shtetësi shqiptare janë arrestuar këtë të enjte, më 14 maj, pasi policia çmontoi një plantacion marijuane brenda një vile luksoze, të ndodhur në Sant Salvador në Mataró, në rajonin Maresme të Spanjës.
Operacioni ka shkaktuar shumë kureshtje te banorët, sidomos te komuniteti arsimor i shkollës Salesianos, e cila ndodhet shumë pranë zonës. Prindërit, nxënësit dhe mësuesit panë që herët në mëngjes një operacion me një numër të madh policësh.
Hetimi u nis nga një njësi e Agjencisë Tatimore që merret me luftën kundër narko-trafikut dhe pastrimit të parave, ndër të tjera.
Agjentët hapën çështjen pasi zbuluan dërgimin e një pakete me postë që përmbante marijuanë. Megjithatë, nuk dihet ende nga ishte nisur paketa dhe nëse të arrestuarit ishin marrësit apo dërguesit e saj.
Më në fund, këtë të enjte, pas procedurave të nevojshme dhe me autorizim gjyqësor, agjentët kryen kontroll në vilën e ndodhur mes shkollës Salesianos dhe sheshit Granollers.
Gjatë operacionit, hetuesit gjetën: 300 bimë marijuane, 300 fidanë dhe 45 kilogramë sytha kanabisi.
Gjithashtu u sekuestrua edhe një makinë, për të cilën nuk janë bërë publike marka apo modeli.
Operacioni përfundoi me arrestimin e dy shqiptarëve, për të cilët nuk janë dhënë detaje mbi moshën apo precedentët penalë. Ata u dërguan në komisariat dhe pritet të dalin para gjykatësit kujdestar.
