Policia po vijon hetimet për identifikimin dhe kapjen e autorëve të vrasjes së biznesmenit Mondi Mehalla, i njohur ndryshe si Edmond Hyka, në Elbasan. Grupi hetimor ka analizuar me kujdes kamerat e sigurisë pranë biznesit të viktimës, dhe ka vënë re disa lëvizje të dyshuar të autorëve, të cilët duket se kanë ndjekur me detaje lëvizjet e biznesmenit.
Sipas hetimeve të deritanishme, autorët, që kanë pasur informacion të saktë mbi vendndodhjen e viktimës, janë parë disa herë duke lëvizur rreth biznesit.
Pas një periudhe pritjeje, ata kanë vepruar kur biznesmeni ka dalë nga zyra e tij dhe ka hipur në automjetin e tij. Në atë moment, automjeti i dyshuar i autorëve, një Audi me ngjyrë të zezë, ka arritur pranë biznesmenit, ku një nga autorët ka dalë nga makina dhe ka qëlluar disa herë me pistoletë drejt shënjestrës. Personi tjetër, që ka mbajtur rolin e shoferit, është larguar menjëherë nga vendi i ngjarjes.
Në lidhje me automjetin Audi, i cili mendohet të jetë përdorur nga autorët, policia ka konfirmuar se ai është gjetur i djegur. Sidoqoftë, brenda tij nuk është gjetur arma e krimit, që do të mundësonte prova shtesë për hetimin.
Nga hetimet paraprake, ka dalë se vetëm një nga autorët ka qëlluar, ndërkohë që të dhëna të tjera të mbledhura nga dëshmitarët dhe kamerat e sigurisë janë duke u shqyrtuar nga hetuesit për të zbardhur plotësisht ngjarjen.
Policia ka mbledhur prova të rëndësishme që mund të çojnë në identifikimin e autorëve dhe zbardhjen e ngjarjes, ndërsa hetimet vazhdojnë në disa drejtime.