Më 20 maj, ditën kur do të kishte festuar ditëlindjen, Ilaria Sula u përkujtua mes dhimbjes dhe kujtimit të një jete të ndërprerë në mënyrë tragjike. Por ndërsa miqtë dhe të afërmit nderojnë kujtimin e saj, një zhvillim i ri tronditës ka ndodhur në hetimin për vrasjen e saj.
Mark Samson, 24-vjeçari filipinas i akuzuar për vrasjen e studentes shqiptare, ka hequr dorë nga avokati i tij, Fabrizio Gallo – një figurë kyçe që ndihmoi në zbardhjen e disa detajeve kyçe të çështjes, përfshirë gjetjen e telefonit të Ilarias, që për një muaj ishte fshehur nën dyshekun e prindërve të Samsonit.
Samson fillimisht kishte gënjyer se e kishte hedhur telefonin në një pus, por më vonë e tregoi vendndodhjen e vërtetë pas këshillës së avokatit Gallo. Ky i fundit, pas revokimit të mandatit, deklaroi se kishte vepruar në emër të së vërtetës dhe drejtësisë, duke këshilluar të pandehurin që të bashkëpunonte me hetuesit.
Revokimi i tij ka shkaktuar reagime të forta në Itali dhe shihet si një përpjekje për të ndryshuar linjën mbrojtëse në procesin gjyqësor që pritet të jetë i gjatë dhe i ndërlikuar.
Ndërkohë, hetimet janë zgjeruar dhe përfshijnë tashmë edhe nënën e Samsonit, Nors Manlapaz, e dyshuar për ndihmë pas krimit, konkretisht për pastrimin e gjurmëve të gjakut në banesë.
Ngjarja e rëndë ndodhi më 25 mars, kur pas një debati në shtëpinë e tij, Samson vrau Ilarian dhe më pas hodhi trupin e saj nga një shkëmb në Capranica Prenestina. Rasti ka tronditur opinionin publik në Shqipëri dhe Itali, duke u kthyer në simbol të dhunës ndaj grave dhe nevojës për drejtësi.
Në këtë përvjetor të hidhur, mes pikëllimit dhe reflektimit, familjarët e Ilaria Sulës, bashkë me publikun, presin drejtësi për humbjen e një jete të re që u ndërpre dhunshëm.