Zbardhen detaje të reja nga atentati i djeshëm në zonën e Lungomares në Vlorë, ku objektiv ishte Inez Hajrulla, një personazh i njohur për drejtësinë.
Deri tani janë shoqëruar tetë persona për t’u marrë në pyetje, ndërsa janë sekuestruar edhe kamerat e bizneseve për të identifikuar autorët.
Bazuar te burimet nga grupi hetimor, në makinën tip Land Rover, që nga hetimet rezultoi të ishte me targa të vjedhura ku dhe janë sekuestruar dy automatikë të djegur kanë qenë katër persona.
Fillimisht njëri nga katër personat që kanë qenë në makinë ka qëlluar në drejtim të tavolinës ku ishte ulur Inez Hajrulla së bashku me personat e tjerë. Por duke parë që plumbat nuk e kapën, një tjetër ka zbritur nga makina dhe i është afruar duke qëlluar, por Inez Hajrulla është kundërpërgjigjur me zjarr.
Qitësit me sa duket kanë qenë amatorë, pasi asnjë nga plumbat nuk ka kapur objektivin, por është plagosur krejt rastësisht një punonjës i bashkisë së Vlorës i quajtur Dajko Cenodemaj 58 vjeç. Ndërkohë që policia është në kërkim edhe të Hajrullës dhe personave të tjerë që ishin me atë në tavolinë për t’u marrë dëshminë në lidhje me ngjarjen, por asnjëri prej tyre nuk gjendet.
Inez Hajrullës i është bërë atentat me tritol edhe në vitin 2017. Ai ka qenë dy herë i arrestuar për armëmbajtje pa leje, i akuzuar edhe për grabitjen e një kazinoje në vitin 2013. Hajrulla është shoqëruar dhe hetuar edhe për pengmarrjen dhe zhdukjen e Elvis Troqes. Lokali ku ndodhi në zonën që frekuentohej nga Edison Harizaj i vrarë në Durrës në 2018-ën. 27-vjeçari Hajrulla, djalë i biznesmenit vlonjat, Robert Hajrulla, njihet si person me rrezikshmëri në Vlorë./ Report Tv