Deklaratat e deputetit të VLEN, Adnan Azizi, lidhur me zhvillimet politike në Shqipëri kanë ngjallur diskutime, duke ngritur pyetje mbi përfshirjen e politikanëve nga jashtë vendit në debatet e brendshme shqiptare.
Azizi akuzoi BDI-në për propagandë dhe etiketime politike, duke i lidhur qëndrimet e saj edhe me institucionet shqiptare. Reagimi i tij erdhi në një moment kur autoritetet në Tiranë kanë ashpërsuar retorikën ndaj personave që, sipas tyre, ndërhyjnë në çështje që prekin interesat e Shqipërisë.
Në të njëjtën periudhë, ministri i Brendshëm i Shqipërisë, Besfort Lamallari, deklaroi se vendimi për shpalljen “non grata” të Ikballe Hudutit nuk do të jetë një rast i vetëm. Ai paralajmëroi se masa të ngjashme mund të merren edhe ndaj shtetasve të huaj që, sipas institucioneve shqiptare, angazhohen në veprime që bien ndesh me interesat kombëtare dhe procesin e integrimit evropian të vendit.
Kjo ka nxitur diskutime nëse reagimi i Azizit është thjesht një qëndrim politik apo lidhet me klimën e krijuar pas këtij paralajmërimi të autoriteteve shqiptare. Deri tani nuk ka asnjë indikacion apo deklaratë zyrtare që e lidh deputetin e VLEN-it me ndonjë procedurë të tillë, megjithatë koha dhe konteksti në të cilin erdhi reagimi kanë hapur debat në opinion.
Paralajmërimi i ministrit Lamallari për mundësinë e shpalljeve të tjera “non grata” ka rikthyer në fokus diskutimin mbi rolin dhe ndikimin e aktorëve politikë jashtë Shqipërisë në zhvillimet e brendshme politike të vendit.