Në mbledhjen e tij të parë për vitin 2026, Klodian Braho, kryeprokurori i ri i SPAK, ka theksuar rëndësinë e trajtimit me prioritet të dosjeve të mbartura, duke kërkuar që të merren vendime brenda një kohe të arsyeshme për çdo rast. Braho zhvilloi takimin me trupën e prokurorëve të posaçëm, duke i udhëzuar ata që të intensifikojnë hetimet për çështjet që lidhen me korrupsionin dhe pastrimin e parave.
Në mbledhjen e zhvilluar të enjten, Braho prezantoi gjithashtu emrat e rinj në drejtimin e sektorëve të SPAK. Vladimir Mara u emërua drejtues i sektorit për hetimin e krimit të organizuar, Dorina Bejko u bë shefe e sektorit për hetimin e korrupsionit, ndërsa Altin Dumani mori detyrën si shef i sektorit për marrëdhëniet juridiksionale me jashtë.
Kryeprokurori i SPAK kërkoi që trupa të jetë e fokusuar dhe të angazhohet maksimalisht për të zbardhur çdo akt të paligjshëm, duke i dhënë një prioritet të veçantë hetimeve për korrupsionin dhe pastrimin e parave.