Një ngjarje tepër e rëndë ka tronditur qytetin e Pejës dhe familjen Maloku, e cila brenda një kohe shumë të shkurtër humbi dy djemtë e saj.
Gazmend Maloku, i njohur nga të afërmit si Meni, humbi jetën tragjikisht pas një aksidenti me motoçikletë, duke mos arritur t’u mbijetojë plagëve të marra. Dhimbja u bë edhe më e madhe pasi vëllai i tij, Bashkim Maloku, i cili ndodhej i shtruar në spital për shkak të një sëmundjeje të rëndë, mori lajmin për vdekjen e Gazmendit.
Sipas të afërmve, gjendja emocionale dhe shëndetësore e Bashkimit u rëndua menjëherë pas marrjes së lajmit tragjik dhe vetëm pak kohë më vonë ai ndërroi jetë.
Humbja e dyfishtë ka lënë në pikëllim të thellë familjen, miqtë dhe gjithë komunitetin në Pejë. Dy vëllezërit do të varrosen sot në varrezat e qytetit, ku familjarë e qytetarë do t’u japin lamtumirën e fundit.
Ngjarja ka prekur shumë njerëz edhe në rrjetet sociale, ku janë shpërndarë qindra mesazhe ngushëllimi dhe solidariteti për familjen Maloku