Janë publikuar detaje të reja lidhur me konfliktin fatal të ndodhur mbrëmjen e kaluar në Gjashtë, ku mbeti i vrarë Rexhep Ismaili.
Në qendër të hetimeve ndodhet edhe Viktor Ruçi, 50-vjeçari që sipas hetimeve paraprake dyshohet të ketë qenë një nga personat kyç në konfliktin që degradoi në shkëmbim zjarri.
Sipas burimeve hetimore, përplasja ka nisur pas një konflikti mes Kostandin Vogli dhe Viktor Ruçit. Dyshohet se Vogli kishte thirrur disa të rinj pasi kishte konstatuar praninë e Ruçit në lokalin në pronësi të Ismailit.
Fillimisht palët janë përfshirë në konflikt fizik me sende të forta, por më pas situata ka dalë jashtë kontrollit dhe është përdorur armë zjarri.
Nga të shtënat mbeti i plagosur në këmbë Kostandin Vogli, ndërsa hetuesit dyshojnë se një prej të rinjve që ndodhej në grupin e tij ka qëlluar ndaj Rexhep Ismailit, duke i shkaktuar vdekjen.
Pas ngjarjes, Kostandin Vogli u vetëdorëzua në polici dhe u transportua në spitalin e Sarandë për ndihmë mjekësore. Burime bëjnë me dije se ai pritet të transferohet drejt Vlorë për trajtim më të specializuar dhe për arsye sigurie.
Sipas raportimeve, Viktor Ruçi është me origjinë nga Tepelenë dhe banonte prej vitesh në fshatin Gjashtë. Emri i tij rezulton i përmendur më herët edhe në hetime të lidhura me trafik droge dhe precedentë penalë.
Policia vijon hetimet për zbardhjen e plotë të dinamikës së konfliktit dhe identifikimin e të gjithë personave të përfshirë në ngjarjen e rëndë.
