Violand Braçellari u dënua dy herë për kultivim kanabisi, përkatësisht me 10 dhe 5 vite burg, por ato janë vetëm ajo çfarë dihet deri më sot nga veprimtaria e tij e rëndë kriminale.

Pasi iu shmang drejtësisë, pavarësisht se mbetej në kërkim, aktiviteti i tij u zgjerua. Ai krijoi bazën e tij duke zgjeruar stanin në malin e Bodes. Emri i tij rishfaqet në kartelat e policisë në vitin 2019, kur plagosi kushëririn e tij, Gani Braçellari, teksa u përleshën mes tyre. Ngjarja ndodhi më 26 prill 2019, ndërsa procedimi u regjistrua më 5 qershor. Arsyeja e sherrit është banale, por veprimet e vrasësit tregojnë shumë për karakterin e tij të dhunshëm dhe rrezikshmërinë që paraqiste si person.

“Berdane Braçellari, nëna e Violandit, ka hapur derën e haurit me qëllim nxjerrjen e viçave në kullotë. Në atë kohë, shtetasi Gani Braçellari ka qenë duke nxjerrë rakinë në oborrin e shtëpisë së tij.”

Në atë kohë, bagëtitë e Berdanes kanë hyrë në oborrin e kushëririt dhe kanë shkelur zorrën e ujit. Këtu ka nisur debati ndërmjet tyre. Në atë moment ka mbërritur Violandi, i cili e ka goditur Ganiun me shkop në kurriz dhe në këmbë. Nga rezultatet ka dalë se Gani Braçellarit, pas goditjeve të marra, i janë shkaktuar shembje në shpinë, në kofshën e majtë, hematoma në të dy anët e shpinës, si dhe në krah. Pavarësisht ngjarjes dhe pranisë së Violandit në atë zonë, nuk është bërë e mundur gjetja dhe arrestimi i tij. Pas mbylljes së hetimeve dhe kalimit të dosjes në seancë paraprake në gjykatë, Gani Braçellari, më 25 nëntor 2019, deklaroi para trupit gjykues se e kishte falur kushëririn e tij dhe nuk dëshironte që ai të ndiqej më penalisht.

“E kam falur kushëririn tim, Violand Braçellari, për goditjen me shkop. I kemi rregulluar marrëdhëniet me njëri-tjetrin dhe nuk dua që çështja të ndiqet penalisht”, u shpreh kushëriri i Violandit, Gani Braçellari.

Mjaftoi kjo dëshmi për të mos u rënduar më tej pozita penale e “Landit” dhe që çështja të pushohej, pavarësisht ekzistencës së faktit penal. Nuk dihet nëse kushëriri ishte kërcënuar nga Violandi për tërheqjen e denoncimit, por ngjarja konfirmoi vendin ku qëndronte i qetë i shumëkërkuari i drejtësisë. Mbi të gjitha, ajo tregoi se ai nuk kishte mëshirë as për njerëzit e gjakut.

“Në rast se kemi të bëjmë me një person të armatosur, për të cilin informacionet janë të tilla, patjetër që duhet mbështetja e forcave speciale. Janë të vetmet struktura që kanë aftësinë dhe përgatitjen për të ndërhyrë në situata të tilla. Absolutisht, policia lokale nuk duhet të ndërmarrë rreziqe të tilla, edhe sikur të mos ekzistojë ky nivel rrezikshmërie”, u shpreh avokati Gjergj Nikolli.

“Në qoftë se do të zbatohen procedurat standarde të çdo institucioni, qoftë të drejtorive vendore apo të çdo strukture brenda tyre, besoj se nuk do të ketë këto përplasje dhe gabime që janë bërë, siç ndodhi në rastin konkret. Sepse detyra do t’i jepet dhe do të kryhet nga ajo strukturë që ligji e ngarkon për ta ndërmarrë këtë veprim”, u shpreh drejtues i sindikatës së policisë, Sadedin Fishta.