Një 42-vjeçar nga Kavaja është arrestuar nga policia, i dyshuar për shfrytëzim për prostitucion të një vajze të re, si në Shqipëri, ashtu edhe në Itali.
Sipas njoftimit zyrtar, në pranga ka rënë shtetasi me inicialet F. I., 42 vjeç, banues në Kavajë. Hetimet e zhvilluara zbuluan se abuzimi ka vijuar për një periudhë prej 3 vitesh, duke përfshirë udhëtime dhe qëndrime të organizuara me qëllim përfitimi financiar nga shfrytëzimi seksual.
Policia e Shtetit bëri me dije se operacioni është zhvilluar në bashkëpunim me autoritetet italiane, ndërsa materialet i janë referuar tashmë Prokurorisë për veprime të mëtejshme ligjore.
Njoftimi:
Kapet një 42-vjeçar që dyshohet se për 3 vjet, ka shfrytëzuar për prostitucion, brenda dhe jashtë vendit, një 30-vjeçare.
Si rezultat i administrimit të menjëhershëm, të kallëzimit të një shtetaseje 30 vjeçe, se ishte shfrytëzuar për prostitucion, në Shqipëri dhe në Itali, për rreth 3 vjet, nga shtetasi F. I., 42 vjeç, banues në Kavajë, specialistët për Hetimin e Trafiqeve të Paligjshme mundësuan kapjen dhe vënien në pranga të 42-vjeçarit.
Gjithashtu, shërbimet e Policisë, bashkëpunuan me shërbimet sociale, me qëllim akomodimin e 30-vjeçares, në një qendër të përshtatshme për të.
Në bashkëpunim me Prokurorinë vijojnë hetimet për dokumentimin e plotë ligjor të këtij rasti.
Materialet procedurale iu referuan Prokurorisë së Durrësit, për veprime të mëtejshme, për veprat penale “Trafikimi i personave të rritur” dhe “Shfrytëzimi i prostitucionit”.