Një aksident i rëndë ka ndodhur mëngjesin e kësaj të hëne në Dushk të Lushnjës, ku një 60-vjeçar, Rexhep Rrasa, është aksidentuar me zetor dhe ndodhet në gjendje të rëndë për jetën.
Sipas raportimeve, Rrasa po mbledhte ullinj në pronën e tij kur, në një terren të vështirë, humbi kontrollin mbi mjetin bujqësor dhe ra në një gropë, duke u ngecur mes trungjeve të ullinjve. Bashkëfshatarët e tij kanë theksuar se drejtimi i mjeteve bujqësore kërkon leje dhe përvojë të veçantë, ndërsa rrugët në zonat e parcelave shpesh janë të rrezikshme për shkak të mos sistematizimit.
I aksidentuari mori ndihmën e parë në spitalin e Lushnjës dhe më pas u dërgua në Tiranë për mjekim të specializuar, pasi ka pësuar dëmtime në të gjithë trupin. Ky incident shënon një tjetër rast të aksidenteve me mjete bujqësore në zonën e Myzeqesë, ku sipas policisë së qarkut Fier, brenda këtij viti janë regjistruar dy raste të tjera të rënda me traktorë.
Autoritetet vazhdojnë të nxisin kujdesin gjatë përdorimit të mjeteve bujqësore për të parandaluar ngjarje të tilla të fatkeqësive.