Detaje të reja kanë dalë në dritë lidhur me ngjarjen e rëndë të ndodhur në Orosh të Fushë-Arrëzit, ku Erzen Uka dhe Julian Cumraku (të njohur edhe si Hamza Uka dhe Adem Cumraku) qëndruan të “ngujuar” për orë të tëra brenda një banese, nga ku është qëlluar edhe me armë zjarri. Sipas ekspertëve kriminalistë, në duart dhe veshjet e Ukës janë konstatuar mbetje baruti.
Grupi hetimor ka sekuestruar edhe kamerat e sigurisë në bashkinë e Fushë-Arrëzit, ku janë parë Uka, Cumraku dhe një person i tretë, ende i paidentifikuar, që dyshohet t’i ketë ndihmuar. Në kuadër të hetimeve është marrë në pyetje edhe vajza me të cilën Cumraku kishte pasur një takim para ngjarjes, megjithatë ende nuk janë bërë publike detaje nga dëshmia e saj.
Sipas raportimeve, një plumb i qëlluar nga brenda banesës është fiksuar gjatë kqyrjes së vendngjarjes, pasi Uka dhe Cumraku u vetëdorëzuan. Ndërkohë, Policia e Shtetit nuk ka sqaruar ende rrethanat e plagosjes së Erzen Ukës, i cili pas dorëzimit u dërgua për trajtim në spitalin rajonal të Shkodrës me një plagë në këmbën e djathtë.
Aktualisht, ndaj Ukës dhe Cumrakut – të cilët dyshohen për lidhje me veprimtari ekstremiste – prokuroria ka ngritur vetëm akuzën e armëmbajtjes pa leje. Nuk ka ende prova të plota për të përcaktuar qëllimin e tyre, praninë e tyre në banesën ku u gjetën armë, municione dhe një flamur i ISIS-it i varur në mur, si dhe rolin e mundshëm që ata kanë pasur gjatë qëndrimit disa javor në atë ambient.