EMRAT/ Qëlloi me armë drejt makinës në Kuçovë, kapet në Tiranë 32-vjeçari! Në pranga dhe bashkëpunëtori i tij

Një 32-vjeçar është arrestuar në Tiranë, vetëm pak orë pas të shtënave me armë zjarri drejt një automjeti të parkuar në Kuçovë. Në pranga ka përfunduar edhe 49-vjeçari Ardian Xhako, i dyshuar se ka përkrahur autorin. Gjatë kontrollit në banesën e tij, policia gjeti dhe sekuestroi një armë zjarri dhe municion.

Ngjarja ndodhi në lagjen “1 Maji” të Kuçovës, ku Arlien Çepele alias Arlind Gjoligaj 32 vjeç qëlloi me armë makinën në pronesi te Senad Rroshnikut, që ishte e parkuar. Nuk dihen ende arsyet që qëndrojnë pas këtij veprimi, por hetimet vijojnë.

Njoftimi i policisë:

Kuçovë / Qëlloi me armë zjarri drejt një automjeti të parkuar, brenda pak orëve kapet dhe vihet në pranga autori i dyshuar. Në pranga edhe një shtetas tjetër, i dyshuar për përkrahjen e autorit të krimit. Sekuestrohen arma e zjarrit dhe municion.

Në vijim të informacionit të dhënë më datë 23.08.2026, për ngjarjen e ndodhur në lagjen “1 Maji”, Kuçovë, ku u qëllua me armë zjarri në drejtim të një automjeti të parkuar, shërbimet e Komisariatit të Policisë Kuçovë, në bashkëpunim me Prokurorinë Berat dhe Forcën e Posaçme Operacionale të DVP Tiranë, vijuan veprimet intensive për lokalizimin dhe kapjen e autorëve të dyshuar. Si rezultat i veprimeve të shpejta hetimore dhe punës së koordinuar, në Tiranë, u bë e mundur lokalizimi dhe kapja e shtetasve A. Ç., alias A. Gj., 32 vjeç, dhe A. Xh., 49 vjeç, të dy banues në Kuçovë.

Gjatë kontrollit të banesës së shtetasit A. Xh., në tarracë u gjetën dhe u sekuestruan një armë zjarri dhe disa fishekë, të cilat dyshohet se lidhen me ngjarjen. Në përfundim të veprimeve procedurale u bë arrestimi i shtetasve:

– A. Ç., për veprat penale “Mbajtja pa leje e armëve dhe municionit”, “Kanosja” dhe “Shkatërrimi i pronës”.
– A. Xh., për veprat penale “Përkrahja e autorit të krimit” dhe “Veprime që pengojnë zbulimin e të vërtetës”.

Gjithashtu, u procedua në gjendje të lirë shtetasi S. Gj., 65 vjeç, banues në Kuçovë, për veprën penale “Veprime që pengojnë zbulimin e të vërtetës”. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.