Marrëdhënia e Monika Kryemadhit me politikën duket se është një kapitull i kaluar, pasi ish-kryetarja e Partisë Lëvizja Socialiste për Integrim (PL) po i kushtohet plotësisht kinematografisë dhe botës së shoubizit. Një foto e publikuar nga Kryemadhi ka tërhequr menjëherë vëmendjen e rrjeteve sociale, ku ajo shfaqet e ulur përkrah një zotërie, duke shtuar kureshtje mes ndjekësve të saj për identitetin e tij.
Përgjigjen e dha vetë Kryemadhi, duke zbuluar se bëhet fjalë për Charles Kipps, një emër i njohur në botën televizive dhe letrare amerikane. Kipps është skenarist dhe producent televiziv i disa prej serialeve më të famshme si “Law & Order” dhe “Kojak”. Po ashtu, ai është autor i librave të njohur, mes të cilëve spikasin titujt “Conor Bard Mystery”, “Hell’s Kitchen Homicide” dhe “Times Square Tango”. Kipps është gjithashtu fitues i çmimit prestigjioz Emmy për punën e tij si producent dhe skenarist.
Në foto, Kryemadhi shfaqet me një kopje të librit “Hell’s Kitchen Homicide”, të nënshkruar posaçërisht për të, ndërsa në përshkrim ajo zbulon se takimi lidhet me një projekt të ri që duket se po merr formë. Ky bashkëpunim i papritur mes një ish-deputeteje shqiptare dhe një prej emrave të njohur të skenaristikës amerikane ka ngjallur shumë diskutime dhe pyetje për natyrën e projektit. A do të jetë një film, një dokumentar, apo ndoshta një seri televizive? Për momentin, mbetet të presim detajet.