Polumbarët e RENEA-s dhe shërbimet e Policisë, po vijojnë kërkimet në lumin e Vjosës, për gjetjen e 65-vjeçarit të humbur, Ylli Dine.
Prej ditës së djeshme, grupet e kërkim-shpëtimit vijojnë kërkimet për gjetjen e fermerit që kishte dalë nga shtëpia për të ruajtur bagëtitë sipas vëllait të tij që bëri denoncimin, e më pas nuk ishte kthyer më.
Palombarët kanë kryer zhytje përgjatë rrjedhës së Vjosës. 65-vjeçari dyshohet se pasi është rrëzuar, e ka marrë nga rrjedha e lumit Vjosa, në afërsi të vendit të quajtur “Fusha e fshatit Peshtan”, në Tepelenë.
Në operacionin e kërkimit janë të angazhuar polumbarët e RENEA-s, Forca e Posaçme “Shqiponja” e Drejtorisë Vendore të Policisë Gjirokastër, shërbimet e Komisariatit të Policisë Tepelenë, Shërbimi i Mbrojtjes nga Zjarri dhe Shpëtimi, përfaqësues të Forcave të Armatosura, si dhe forca vullnetare e familjarë, të cilët vijojnë krehjen e shtratit të lumit nga të dyja anët.
Deri në këto momente, nuk është bërë e mundur gjetja e 65-vjeçarit.
Angazhimi i strukturave të Policisë së Gjirokastrës, polumbarëve të RENEA-s dhe strukturave të tjera të përfshira në operacionin e kërkimit, për të bërë të mundur gjetjen e trupit të 65-vjeçarit, ka qenë i plotë dhe vijon me intensitet.
