Një çift shqiptar ka përfunduar në prangat e policisë italiane pas një ndjekjeje në rrugët e Acuto-s, në provincën e Frosinone-s. Burri dhe gruaja akuzohen për posedim të lëndëve narkotike me qëllim shpërndarjen, ndërsa gjatë tentativës për t’u larguar dyshohet se hodhën nga automjeti një pako me kokainë.
Ngjarja nisi në aksin Via Anticolana-SR 155, ku efektivët e Komisariatit të Fiuggi-t po kryenin kontrolle të zakonshme në territor. Gjatë patrullimit, policët konstatuan një automjet me dy persona brenda dhe vendosën ta ndalonin për verifikim.
Sipas mediave italiane, drejtuesja e automjetit nuk iu bind sinjalit të policisë. Në vend që të ndalonte, ajo dyshohet se shtoi shpejtësinë dhe nisi të kryente manovra të rrezikshme, përfshirë parakalime pranë kthesave, duke vënë në rrezik edhe drejtuesit e tjerë të mjeteve.
Gjatë ndjekjes, pasagjeri dyshohet se hodhi një pako nga dritarja. Objekti u lokalizua më pas nga efektivët dhe, pas kontrollit, rezultoi se përmbante lëndë narkotike.
Arratisja përfundoi pasi policia arriti të bllokonte makinën. Për shkak të sjelljes së dy shqiptarëve pas ndalimit, në vendngjarje u kërkua edhe mbështetja e forcave të tjera, mes tyre një patrullë e karabinierëve.
Nga kontrollet dhe veprimet e mëtejshme hetimore u sekuestruan 10.04 gramë kokainë, 320 euro në para të gatshme dhe disa telefona celularë. Nën sekuestro përfundoi gjithashtu automjeti me të cilin udhëtonte çifti.
Pas arrestimit, dy të dyshuarit u dërguan në institucione të ndryshme të vuajtjes së dënimit. Burri u transferua në burgun e Frosinone-s, ndërsa gruaja në burgun Rebibbia të Romës.
Autoritetet italiane po vijojnë hetimet për të përcaktuar aktivitetin e çiftit dhe për të sqaruar më tej rrethanat e pranisë dhe lëvizjeve të tyre në territorin italian.