Ervis Matodashaj, i njohur ndryshe me nofkën “Çoke qorri”, është shpallur në kërkim nga SPAK, si një individ që sipas hetimeve rezulton i lidhur ngushtë me Inez Hajrulla. Ky i fundit identifikohet nga autoritetet si drejtues i një grupi të strukturuar kriminal që vepron në Vlorë.
Më 7 mars, gjatë një operacioni të zhvilluar me urdhër të SPAK, të dy arritën t’i shmangeshin arrestimit. Hajrulla konsiderohet një person me rrezikshmëri të lartë dhe gjatë viteve ka qenë disa herë objekt atentatesh.
Ngjarja më e hershme e përmendur në dosje daton në vitin 2017, kur ndaj tij u tentua një sulm me eksploziv (tritol) në një lokal në Vlorë, zonë e njohur si e frekuentuar edhe nga Edison Harizaj.
Një tjetër sulm u regjistrua në vitin 2019, kur Hajrulla ndodhej së bashku me Matodashajn në zonën e quajtur “7 pallatet Oslo”. Aty u qëllua me armë zjarri në drejtim të tyre, duke lënë të plagosur aksidentalisht Dajko Canodemaj. Autorët u larguan nga vendi i ngjarjes dhe më pas dogjën automjetin në Babicë të Vogël.
Në gusht të vitit 2023, autoritetet zbuluan një tjetër plan për atentat ndaj tyre. Në zonën e Ujit të Ftohtë në Vlorë u arrestua 35-vjeçari Amarildo Nikolli, i cili u kap me armë me silenciator, municion dhe pajisje të tjera që dyshohej se do të përdoreshin në sulm. Sipas hetimeve, objektiv i këtij plani ishin pikërisht Hajrulla dhe Matodashaj.
Ndërkohë, të dy janë shpallur në kërkim edhe për përfshirje të dyshuar në dy vrasje të ndodhura në Vlorë gjatë vitit 2021.
Rasti i parë lidhet me 6 shkurtin, kur u ekzekutua Gentian Qarri. Hetimet paraprake sugjerojnë se vrasja mund të ketë qenë një akt hakmarrjeje. Dyshohet se objektivi fillestar ishte Fatmir Hyseni, i njohur si “Doqja”, i lidhur me vrasjen e Edison Faqedjegurit. Duke mos arritur ta godasin atë, autorët dyshohet se kanë vrarë kushëririn e tij, Gentian Qarri, menjëherë pasi kishte dalë nga banesa.
Ngjarja e dytë ndodhi më 10 maj të po atij viti, kur u vra Bledar Birçaj. Sipas dyshimeve, kjo vrasje lidhet me zhdukjen e një sasie kokaine në Spanjë, vend nga ku Birçaj ishte kthyer pak kohë më parë. Ai u ekzekutua në rrugën “Hajro Çakërri”, ndërsa lëvizte me automjetin e tij tip BMW X5.