Një 28-vjeçar i shpallur në kërkim kombëtar që prej vitit 2024 për veprimtari të rrezikshme kriminale është vënë në pranga nga Policia e Shtetit. Bëhet fjalë për Alban Bruçin, banues në Shkodër, i cili u arrestua në rrugën “Teodor Keko” në kryeqytet gjatë një operacioni të koduar “Operacionalja 67”.

Bruçi ishte në një motor në momentin e arrestimit, mjet që drejtohej nga 37-vjeçari Arjan Sardi, i cili gjithashtu u ndalua nga policia për akuzën “përkrahje të autorit të krimit”.

Gjatë kontrollit fizik, 28-vjeçarit iu gjetën dhe sekuestruan një shumë parash, tre aparate celularë, një kartë SIM dhe një kartë identiteti italiane e dyshuar si e falsifikuar.

Alban Bruçi akuzohet për “Vrasje me paramendim”, mbetur në tentativë, si dhe për “Mbajtje pa leje dhe prodhim të armëve, armëve shpërthyese dhe municioneve”. Ai dyshohet si organizatori dhe ekzekutori i atentatit ndaj boksierit Arjon Kajoshi, ngjarje e ndodhur më 7 shtator 2024 në Shkodër.

Sipas burimeve policore, atentati dyshohet se kishte motiv hakmarrjen për plagosjen e babait të tij, Vladimir Bruçi, 62 vjeç, nga Arlind Kajoshi vëllai i sportistit të shënjestruar. Ngjarja që ndezi konfliktin kishte ndodhur më 3 qershor të po atij viti në Shkodër, për shkak të një sherri banal për një vend parkimi. Në këtë incident ishte i përfshirë edhe vetë Alban Bruçi, i cili ishte hetuar më parë në lidhje me të.

Hetimet po vijojnë për zbardhjen e plotë të ngjarjes dhe identifikimin e bashkëpunëtorëve të tjerë të mundshëm.

Njoftimi i Policisë

Vijojnë operacionet e njëpasnjëshme nga Drejtoria e Forcës së Posaçme Operacionale, për lokalizimin dhe kapjen e shtetasve në kërkim ndërkombëtar dhe kombëtar.

Finalizohet operacioni i koduar “Operacionalja 67”.

Kapet në rrugën “Teodor Keko” dhe vihet në pranga një 28-vjeçar i shpallur në kërkim për tentativë për vrasje me paramendim dhe për armëmbajtje pa leje.

Në momentin e ndalimit, 28-vjeçari posedonte një kartë identiteti italiane false.

Vihet në pranga dhe shtetasi që shoqëronte dhe transportonte 28-vjeçarin, me motomjet.

Në vijim të operacioneve të njëpasnjëshme për kapjen e shtetasve të shpallur në kërkim ndërkombëtar dhe kombëtar, strukturat e Drejtorisë së Forcës së Posaçme Operacionale në DPPSh finalizuan operacionin e koduar “Operacionalja 67”, gjatë të cilit u kap në rrugën “Teodor Keko” dhe u vu në pranga shtetasi:

-A. B., 28 vjeç, banues në Shkodër, i cili ishte shpallur në kërkim me vendimin e vitit 2024, të Gjykatës së Shkodrës, për veprat penale “Vrasja me paramendim”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe municionit”.

Gjatë kontrollit fizik, shtetasi A. B. iu gjetën një shumë parash, 3 celularë, 1 kartë SIM dhe 1 kartë identiteti italiane e dyshuar e falsifikuar, që u sekuestruan në cilësinë e provës materiale.

Gjithashtu, gjatë operacionit u vu në pranga, për përkrahje të autorit të krimit, shtetasi A. S., 37 vjeç, banues në Tiranë, i cili shoqëronte shtetasin A. B., në momentin e kapjes nga shërbimet e Policisë. Nga hetimet dyshohet se shtetasi A. S. transportonte shtetasin A. B., me motomjet, i cili u sekuestrua në cilësinë e provës materiale.

Shtetasit e kapur iu dorëzuan Drejtorisë Vendore të Policisë Shkodër që bëri ekzekutimin e urdhrave për ndalimin e shtetasit A. B. dhe arrestimin e shtetasit A. S..

Materialet procedurale do t’i kalojnë Prokurorisë, për veprime të mëtejshme.