Një shpërthim me lëndë plasëse është regjistruar në orët e para të mëngjesit të sotëm në qytetin e Lezhës. Sipas burimeve, tritoli dyshohet se i është vendosur një automjeti të parkuar, tip “Volkswagen Golf”, në pronësi të Gent Gjetjes, 41 vjeç, punonjës policie dhe agjent i Krimeve në Drejtorinë Vendore të Policisë Lezhë.
Si pasojë e shpërthimit nuk raportohet për persona të lënduar, por vetëm dëme materiale në automjet. Ngjarja ka shkaktuar shqetësim tek banorët e zonës, ndërsa në vendngjarje kanë mbërritur menjëherë forca të shumta policie për të nisur veprimet e para hetimore.
Policia bën me dije se shërbimet kanë nisur kontrolle në zonë për kapjen e autorit ose autorëve, ndërsa grupi hetimor, nën drejtimin e Prokurorisë, po vijon punën për zbardhjen e plotë të rrethanave të ngjarjes dhe dokumentimin ligjor të rastit.