Sali Berisha ka deklaruar se nëse koalicioni i tij fiton zgjedhjet e 11 majit, do të punojnë për krijimin e zonave të lira kufitare me qeverinë e Kosovës. Në një komunikim live në rrjetet sociale, ai theksoi se për zonat verilindore do të hartohet një plan ekonomik për shfrytëzimin e burimeve dhe potencialeve të këtyre zonave, duke ofruar subvencione dhe lehtësime taksash për investimet. Berisha gjithashtu e kritikoi qeverinë për anulimin e ligjit të vitit 2013, që ofronte 8 vite pa taksa për investimet në zonat malore.
Ai shtoi se integrimi i Shqipërisë në Bashkimin Evropian mbetet interesi më i madh kombëtar i Partisë Demokratike dhe se do të vazhdojnë të ndërmarrin reforma të nevojshme për të arritur këtë qëllim. Berisha gjithashtu vuri në dukje se përparimi i vendit në procesin e integrimit është arritur me merita dhe reforma, duke theksuar sukseset e mëparshme të PD-së, si anëtarësimi në NATO dhe liberalizimi i vizave.