Detaje të reja janë zbardhur në lidhje me ngjarjen e rëndë të ndodhur në Lezhë mbrëmjen e djeshme, ku gjashtë anëtarë të një familjeje mbetën të plagosur pas shpërthimit të një bombole gazi.
Një i afërm i familjes Kola ka rrëfyer detaje duke sqaruar se familja jetonte në Itali dhe kishte ardhur në banesën dykatëshe për pushime dhe për një dasmë familjare. Ai tha se bombola ishte jashtë banesës dhe ende nuk dihen rrethanat e plota se si ka ndodhur shpërthimi.
“Jetonin në Itali. Kanë ardhur për pushime. Kishin një dasmë, kishin dasmën e vajzës së vëllait. Mendova se ishte ndonjë gomë e makinave të tonazhit të lartë, por një shok më mori e më tha është dëmtuar Saimiri. Ka shpërthyer një bombol. Bombola ka qenë jashtë. Në këtë banesë nuk jetonte asnjeri, vetëm ata kur vinin me pushime“-, deklaroi i afërmi i familjes.
Kryefamiljari Saimir Kola, i cili do të martonte mbesën e tij ditën e nesërme, ka pësuar djegie të rënda dhe është transportuar me urgjencë drejt Spitalit të Traumës në Tiranë për mjekim të specializuar.