Ish-presidenti Ilir Meta ka reaguar pas përfundimit të seancës gjyqësore, duke ngritur akuza ndaj sistemit të drejtësisë për, sipas tij, standarde të dyfishta dhe ndikim politik në proceset gjyqësore.
Përmes një postimi në rrjetet sociale, Meta shkruan se nuk është surprizuar nga ajo që e cilëson si “drejtësi me regji”, duke shtuar se në procesin e tij nuk është respektuar, sipas tij, as standardi i aplikuar në raste të mëparshme të profilit të lartë.
Ai përmend gjithashtu çështjen e ish-kryeministrit Fatos Nano dhe funksionarëve të periudhës së regjimit komunist, duke argumentuar se trajtimi i tyre gjyqësor ka ndjekur standarde të ndryshme në një kohë kur Shqipëria nuk ishte ende anëtare e Këshilli i Europës.
“Asnjë çudi nga Drejtësia me Regji.
Edhe kur Shqipëria nuk ishte anëtare e Këshillit të Europës, funksionarët publikë gjykoheshin pranë avokatëve të tyre dhe çdo seancë gjykimi transmetohej live.
Por në drejtësinë e George Sorosit, të realizuar me angazhimin e ditur të Charles McGonigal dhe plot të tjerëve si ai, në vend që të respektohet Kushtetuta, Konventa Europiane për të Drejtat e Njeriut dhe thirrja e Komitetit Shqiptar të Helsinkit, shndërrohet në normë standardi i gjykimit të një terroristi në Francë dhe jo standardi i gjykimit të Presidentit të Francës, Sarkozi.
Madje drejtësia sorosiste nuk respekton as standardin e gjykimit të ish-Kryeministrit Nano dhe ish-funksionarëve të regjimit komunist, kur e theksoj, Shqipëria nuk ishte anëtare e Këshillit të Europës.
Loja e zvarritjeve të seancave, me sebepe nga më të ndryshmet, vazhdon nën dirigjimin e prokurorëve, të cilët dihet se kush i komandon.
Sidoqoftë, ka një “koherencë” të plotë, nga standardet e rrëmbimit tim më 21 tetor 2024 e deri te standardet e sotme të gjykimit, sepse për këtë regjim kukullash, të jesh patriot ne fakt do të thotë të jesh terrorist.
Jam krenar për patriotizmin tim dhe kjo më bën të pamposhtur dhe superior përballë burracakëve, që i shërbejnë bandës ndërkombëtare të George Sorosit dhe Kuislingut të tij në Tiranë, që ka nxjerrë në shitje çdo interes kombëtar.”, shkruan Meta.