Një ngjarje e rëndë në vendin e punës i ka marrë jetën një 53-vjeçari shqiptar në qytetin e Modenës, në Itali. Viktima është Murat Tafçiu, baba i katër fëmijëve, i cili humbi jetën teksa ishte i angazhuar në punime ndërtimi në qendër të qytetit.
Aksidenti ka tronditur familjarët dhe të afërmit e tij, të cilët mbërritën menjëherë në kantier sapo morën lajmin. Momente të forta emocionale u shënuan kur vajza e tij, e përfshirë nga dhimbja, thërriste mes lotësh për të atin, një skenë që preku thellë edhe personat e pranishëm. Tragjedia merr një peshë edhe më të madhe për faktin se ndodhi pikërisht në Ditën e Babait.
Ngjarja ndodhi mëngjesin e së njëjtës ditë, rreth orës 08:45, në një kantier pranë zonës së Corso Canalgrande, ku po kryheshin punime restaurimi në një godinë historike. Tafçiu, i cili prej vitesh jetonte në Cavezzo, po punonte mbi një skelë rreth dy metra mbi nivelin e tokës, kur një element i rëndë i strukturës u shkëput papritur dhe e goditi.
Goditja i shkaktoi humbjen e ekuilibrit dhe ai u rrëzua, duke pësuar dëmtime të rënda, veçanërisht në kokë. Edhe pse lartësia nuk ishte e konsiderueshme, plagët rezultuan fatale. Ai humbi ndjenjat menjëherë, ndërsa kolegët e tij kërkuan ndihmë urgjente.
Ekipet mjekësore mbërritën shpejt në vendngjarje, por përpjekjet për ta shpëtuar nuk dhanë rezultat. Vdekja e tij u konfirmua rreth orës 09:30.
Autoritetet italiane kanë nisur hetimet për të sqaruar plotësisht dinamikën e aksidentit. Sipas informacioneve paraprake, nuk ka dyshime për përfshirje të personave të tjerë, ndërsa shkaku kryesor lidhet me shembjen e papritur të një pjese të skelës. Megjithatë, po verifikohet nëse janë respektuar të gjitha masat dhe standardet e sigurisë në vendin e punës.
Pas përfundimit të procedurave në vendngjarje, trupi i pajetë u transportua për ekzaminime të mëtejshme mjeko-ligjore. Ndërkohë, familja e tij përballet me një humbje të rëndë dhe të papritur, që ka lënë pas dhimbje të madhe te të gjithë të afërmit.