Punonjësi i komisariatit të policisë së Rinasit që u kap në përgjime duke marrë para, rikthehet në të njëjtën detyrë, pa mbaruar gjyqi penal.

Fiks fare vërtetoi se si ishte kthyer në të njëjtën detyrë në komisariatin e  policisë së Rinasi punonjësi i rolit bazë, Briken Tereziu, i arrestuar në muajin qershor 2024 me akuzat e korrupsionit pasiv dhe shpërdorimit të detyrës

Në atë kohë, z. Briken Tereziu u ndalua nga Agjencia e Mbikëqyrjes Policore, në bazë të përgjimeve dhe bisedave që iu kapën me kolegq dhe persona të tjera. Në këto biseda, tregohej se ai merrte shuma të konsiderueshme të hollash, me qëllim lejimin e kalimit të shtetasve të ndryshëm, madje edhe të mitur pa prokurë.

Fiks Fare ka mësuar se, 14 muaj pas arrestimit të bujshëm, punonjësi Briken Tereziu është rikthyer në të njëjtën detyrë që ka pasur para arrestimit. Ai është punonjës i rolit bazë në Komisariatin e Policisë në Rinas, pikërisht në të njëjtën pozicion që kontrollon shtetasit.

Hetimet e Prokurorisë së Tiranës zbuluan të gjithë skemën si funksiononin punonjësit, teksa ata flisnin lirisht me njëri tjetrin për kalimin e personave nën moshë pa prokurë. “Atë gocën sot e bëjmë dot?” i shkruan një punonjës Brikenit, teksa ai i përgjigjet se “po”, ndërsa i dërgojnë njëri-tjetrit edhe të dhënat biometrike.

Hetimet e prokurorisë faktuan se personi në fjalë ka kaluar pikërisht nga sporteli i Briken Tereziut, pa prokurë nga prindi tjetër.

Tereziu bashke me 7 punonjës të tij të kontrollit kufitar bashkëpunonin me pronarin e 1 agjencie udhetimi. Ky i fundit  gjente pasagjerë për të udhëtuar drejt vendeve të BE-së, duke marrë përsipër kundrejt pagesave monetare

“ Briken Tereziu per 1 vit ,Prill 2023 – Mars 2024, lejoi daljen nga territori i RSH për 55 shtetas në shkelje të ligjit me ditë qëndrimi në konsumuara në zonën shengen dhe 10 shtetas të mitur, të papajisur me prokurë nga prindërit” thuhet në dosje, e cila ka shkuar në gjykatë, ku Briken Tereziu akuzohet për “Korrupsion pasiv i personave që ushtrojnë funksione publike” dhe “Shpërdorim detyre”.

Gazetarët e Fiks fare kontaktuan me shefin e Komisariatit të Policisë në Rinas, z. Përparim Rama, duke e pyetur se me çfarë vendimi është kthyer në punë z. Briken Tereziu .

Në përgjigjen e tij, shefi i komisariatit të Rinasit thotë se ky punonjës policie nuk është pezulluar ndonjëherë nga detyra, ai ka qenë në detyrë.

Ai thotë se vendimi nuk është marrë nga komisariati i Policisë së Rinasit, pasi nuk e ka këtë tagër, por nga Drejtoria e Përgjithshme e Policisë së Shtetit. Fiksi e pyet për arsyen e rikthimit në të njëjtin vend pune ,ku u kap në shkelje të ligjit ky punonjës. Përgjigja e shefit të komisaritit të Rinasit ishte: “për shkak të fluksit të madh të udhëtarëve, u pa e arsyeshme që të rikthehen në punë 10 ish- punonjës policie”.

Fiks fare ngriti një pyetje: A është ende nën hetim dhe gjykim z. Briken Tereziu?

Fiks Fare kontaktoi me Drejtorinë e Përgjithshme të Policisë së Shtetit, duke e pyetur nëse ka pasur apo jo masë disiplinore z. Briken Tereziut, pas arrestimit në muajin qershor 2024. Fiksi e pyeti se mbi çfarë vendimi është rikthyer në punë ky punonjës.?

Deri me sot  Policia e Shtetit nuk ka kthyer përgjigje

Fiksi i dërgoi një kërkesë për informacion edhe Prokurorisë së Tiranës, teksa morëm një përgjigje se: “Rezulton se mbi bazën e materialit të referuar nga Agjencia e Mbikëqyrjes Policore ndaj shtetasit me inicialet B.T është regjistruar procedimi penal nr.6234 i vitit 2024 për veprën penale  “Shpërdorimi i detyrës”

Më datë 02.04.2025 është dërguar  kërkesë për gjykim me të pandehur shtetasin me inicialet  B.T, i cili është hetuar në gjendje të lirë.”

Për më shumë informacion prokurori na tha që duhet t’i drejtoheshim Gjykatës.

Fiks Fare ka mësuar se, dosja e nisur nga Prokuroria e Tiranës më datë 3 shkurt 2025, është ende në gjykim në Gjykatën e Tiranës. Madje ende nuk është zhvilluar seanca e parë. Kjo seancë pritet të zhvillohet në 22 tetor 2025.

Pra, ende pa përfunduar procesi penal, pa nisur hetimi gjyqësor, një punonjës policie që lejoi dhjetëra shtetas me probleme te kalonin kufirin, apo lejoi të kalonin kufirin të mitur pa prokurën e njërit prind, rikthehet në të njëjtin pozicion, pune

Top Channel