Kreu i ARRSH, dy orë dëshmi para SPAK! Zbulohet çështja për të cilën është pyetur

Kreu i Autoritetit Rrugor Shqiptar (ARRSH), Gentian Gjyli, është paraqitur sot në Prokurorinë e Posaçme SPAK për të dhënë dëshminë e tij. Pas dy orësh pyetjesh nga prokurorët, Gjyli doli nga ambientet e Prokurorisë duke refuzuar të komentojë për gazetarët.

Burime nga SPAK bëjnë me dije se ai është marrë në pyetje lidhur me hetimet mbi abuzimet me tenderat e rrugëve, të cilat dyshohet se kanë ndodhur gjatë kohës që ai mbante postin e nëndrejtorit të ARRSH.

Gentian Gjyli është emëruar si drejtues i Autoritetit Rrugor Shqiptar në mars të vitit të kaluar, pas arrestimit të paraardhësit të tij, Evis Berberi, për akuza të lidhura me korrupsion.

Hetimet për tenderat e rrugëve janë pjesë e përpjekjeve të SPAK për të luftuar abuzimet dhe korrupsionin në institucionet publike në Shqipëri. Deri më tani, autoritetet nuk kanë dhënë detaje të mëtejshme mbi provat apo akuzat e mundshme ndaj Gentian Gjyli.