Kriminelë kibernetikë kanë krijuar një armë të re dixhitale duke marrë nën kontroll më shumë se 14 mijë pajisje interneti në të gjithë botën dhe duke i përdorur ato për sulme masive online.
Sipas një raporti të kompanisë së sigurisë kibernetike Lumen, hakerët kanë përhapur një program të dëmshëm të quajtur “KadNap”, i cili infekton kryesisht routerë të markës Asus, pajisjet që shpërndajnë internetin në shtëpi dhe zyra.
Pasi infektohen, këto pajisje kontrollohen në distancë nga sulmuesit dhe lidhen mes tyre për të krijuar një rrjet të madh të fshehtë. Ky rrjet përdoret më pas për të dërguar një sasi shumë të madhe trafiku drejt faqeve dhe shërbimeve online derisa ato të dalin jashtë funksionit.
Ekspertët paralajmërojnë se ky sistem është shumë i vështirë për t’u ndalur, sepse nuk kontrollohet nga një server i vetëm, por nga mijëra pajisje të shpërndara në vende të ndryshme të botës.
Shumica e pajisjeve të infektuara janë identifikuar në Shtetet e Bashkuara, por raste janë zbuluar edhe në Britani, Australi, Brazil, Rusi dhe në vende të tjera të Europës.
Në shumë raste, pronarët e pajisjeve nuk e kuptojnë se routeri i tyre është marrë nën kontroll. Shenja e vetme mund të jetë ngadalësimi i internetit, ndërsa pajisja përdoret në sfond për sulme ndaj sistemeve të tjera online.
Ekspertët e sigurisë paralajmërojnë se rritja e numrit të pajisjeve të lidhura me internetin në shtëpi, si routerë, kamera sigurie apo pajisje inteligjente, po krijon gjithnjë e më shumë mundësi për kriminelët kibernetikë që të ndërtojnë rrjete të tilla sulmi.