Laert Haxhiu kërkon rigjykim të çështjes, i dënuari përjetë: Më janë shkelur të drejtat

Laert Haxhiu po kërkon të rikthejë edhe një herë në shqyrtim çështjen penale që përfundoi me dënimin e tij me burgim të përjetshëm.

Haxhiu, i dënuar për ngjarjen e vitit 2017 të njohur si “masakra e Lushnjës”, i është drejtuar Gjykatës Kushtetuese, ku kërkon rigjykimin e çështjes.

Në kërkesën e paraqitur, ai pretendon se gjatë procesit ndaj tij nuk janë respektuar disa prej të drejtave dhe lirive themelore të garantuara nga Kushtetuta. Për këtë arsye, kërkon që vendimet gjyqësore të dhëna ndaj tij të shqyrtohen nga Kushtetuesja.

Laert Haxhiu u dënua me burgim të përjetshëm nga Gjykata e Posaçme e Shkallës së Parë, vendim që më pas u konfirmua edhe në Apelin e Posaçëm.

Çështja mbërriti më pas në Gjykatën e Lartë, por më 19 maj 2026 kjo gjykatë vendosi të mos pranonte rekursin e paraqitur prej tij.

Pas mbylljes së kësaj rruge gjyqësore, Haxhiu ka zgjedhur t’i drejtohet Gjykatës Kushtetuese, duke pretenduar shkelje të të drejtave të tij gjatë procesit.